Бурхн Багшин номд нерәдәд

Хальмгт җил болһн сарин литәр хулһн сарин 22-т бурхн-шаҗна сән өдр темдглгднә. Бурхн Багшин гегән 33 бурхна таралңгин орнас бууҗ ирсн өдр олнд йир евәлтә болна.

Эн җил ик чинртә эн байр үкр сарин 11-д темдглгдҗәнә. Судрмудт бичгдсәр эн өдр Бурхн Багшин гегән әмдрлин кемдән бүтәсн арвн хойр алдр кергин негинь кесн болдг. Бурхд залрҗасн һазрас бууҗ ирсмн. Тенд Бурхн Багш һурвн сардан бәәһәд, эврәннь экдән номин цәәлһвр өгсн болдг. Экиннь ач-тусиг хәрүлхәр тиигҗ үүлдсмн.
Эн өдр Бурхн Багшин Алтн сүмд өрүн эртәс авн байрин керг-үүлдврмүд эклв. Эн темдгтә өдр цер авхар ирсн әмтиг өрүн 6 часла гевш Чангчуб тосч авад, Махаянан нег өдрә цер авх ном умшв. Тиигәд эн өдр кен чигн күн болһн нег хонга цер авч, зальврх таалта болв. Иим чинртә өдрлә цер авсн йир евәлтә болдмн. Талданар келхлә, эннь бийән чаңһаҗ авч батллһна дамшлт болҗана. Эн өдр күцәсн үнн седклин дөңгин кергүдин буйн кесг холванд өсч туслхмн болҗана. Күүнд му келго, чик седкләр бәәхлә цуг улст туста болхин тускар эн өдр хурлд ирсн әмтн зальврв.
Тогтсн авъясар 9 часла байрин ик мөргүл болв. Күмн әмтнд туслҗ йовх номин герл цуг делкәд заясн Бурхн Багштан күндллһән медүлҗ эн өдр гелңгүдин ном соңсгдв.
Бурхн Багштан зальврад, эндрк өдрин кергүд иргчин үүлдврт туслтха гиҗ, номин евәлд багтад әмтн эн өдриг давулв.

УШКАНА Сувсн