Билгтә көтчнрәхн

Көтчнр селәнә сойлын герт байрин бәәдлд «Ингилән» бичкдүдин студин ончта өөнд нерәдсн олна орлцата нәр болв. Ода үлгүр болгч өөдән нер зүүҗәдг «Ингилән» 30 җилә өөндән нерәдсн байрин концерт үзүлв.
Билгтә бичкдүдин студьт орлцачнр һучн җилин туршарт белдсн биичнрин то тоолхд амр биш. Кедү концертиг эн коллектив үзүлсн болх. Хамгин түрүнд төрскн сойлдан дурта олн күүкд- көвүдт эрдмиг дасхсн деерән сән сурһмҗ өгсмн. Келн-улсин билг-эрдмиг делгрүллһнә иим коллективс билгтә баһчудыг өскнә.
Билгтә эн коллективиг 30 җилин туршарт Хальмг Таңһчин сойлын ачта көдләч Мацга Анатолий һардҗ йовна. Һучн җилин туршарт Анатолий Иванович олн күүкд-көвүдиг билг-эрдмин хаалһд орулв.
Райондан, таңһчдан нер туурсн коллективиг йөрәхәр Көтчнрт күндтә олн гиичнр, энд билг-эрдмән делгрүлҗ йовсн улс цуглрҗ ирв.
Көтчнрә района толһачин дарук Улана Галина байриг нүр үгәр секв. Көтчнрә района, таңһчин сойлд зөвтә тәвцән орулсн коллективиг йөрәһәд, үүдәгч шин күцәмҗ дурдв.
Района һардврин нерн деерәс Галина Котиновна Мацга Анатолийд ханлтан медүләд, «Көтчнрә районд күргсн ач-тусин төлә» гидг өрчд зүүдг күндтә темдг бәрүлҗ өгв. Района сойлын җирһлд Анатолий Иванович орулсн тәвцинь, өсч йовдг күүкд-көвүдт сурһмҗ өгч, билг-эрдминь делгрүллһнд ик күцәмҗ бәрҗ көдлҗәхинь тиигҗ үнлв.
«Ингиләнд» олн җилд билг-эрдмән делгрүлҗ йовсн, ода чигн коллективин болн Көтчнр селәнә җирһлд орлцҗ йовдг билгтнр бас һардврин ачлврар темдглгдв.
Хальмг Таңһчин Улсин Хуралын (Парламентин) Ахлач Артем Михайловин нерн деерәс депутат Кокан Михаил «Ингилән» студиг өөнләнь йөрәв.
Района сурһуль-эрдмин әңгин һардач Домничева Клара, Көтчнрә СМО-н депутат Эрнҗәнә Вера, Көтчнрә хурл тосхлһна бүрдәмҗин комитетин нерн деерәс Амуна Токтан «Ингилән» коллективиг бас өөнләнь йөрәв.
Студьт ода үүлдҗ йовдг күүкд-көвүдин эк-эцкнрин нерн деерәс Эрнҗәнә Нина болн Аманкан Өлзәт халун йөрәлин үгән нерәдв.
Дәкн нег байрта йовдл эн өдр учрв. Көтчнрә района сойлын болн амрлһна цагин төвин һардач Лариса Летуевад «Хальмг Таңһчин сойлын ачта көдләч» гидг күндтә нерн зүүлһгдв.
«Сюрприз» нертә хореографическ коллективд биилҗ йовсн баһчуд эврәннь һардач Зоя Степановна Очиргоряевала хамдан хальмг би биилҗ, ирсн улст сергмҗ үүдәв. Байрин асхнд орлцсн Хальмг ик сурһулин «Бумбин Орн» ансамблин дуулсн дун болн биилсн би әмтнә тааслт олв. «Ингиләнд» билг-эрдмин хаалһд орсн олн күүкд-көвүд өсәд-босад эн өдр холд йовсн бийнь видеойөрәлән илгәҗ, байр үүдәв.
«Ингилән» - энтн йирин студь гиҗ санхмн биш. Энтн билгтә бичкдүдт төрскнч сурһмҗ өгдг төв болҗана. Мацга Анатолийин цуцрлтан уга көдлмшин ашт төрскн келән меддг, хальмг дууһан дуулдг олн баһчуд энд өссмн. «Ингилән» таңһчин, регионмуд хоорндк, Әрәсән, нарт-делкән кесг марһанд орлцсн коллектив мөн.
Эн студьт билг-эрдмин хаалһан эклсн баһчуд Москван, Санкт-Петербургин болн нань чигн балһсдын ик сурһульд сурч, йоста артистнр болдгнь темдгтә.
Эврән бийнь ду бичдг билгтә көгҗмч болн гүн тоолврта багш Мацга Анатолий эврәннь олн сурһульчнртаһан болн нег һазра улсла хамдан «Ингилән» студин һучн җилин өөнән өргмҗтәһәр темдглв.
ҖИРҺЛИН Кермн