Өнр Боктаевихн диилвр бәрв

Сегодня, 16:58 | Общество, Таңһчин зәңгс, Зіњг

Шидр Ростов-на-Дону балһснд «Энтн мана өрк-бүлин авъяс» гидг Цугәрәсән марһана девсң болв. Терүнд Әрәсән Өмн үзгин болн Ар Кавказин дуһргудын, Донбассин болн Новороссин өрк-бүлмүд, ут тоодан 238 өркин 1234 элч цуглрв. Марһан үкр сарин 13-ас авн 16 күртл болв, өрк-бүлмүд олн зүсн даалһврмуд күцәсн деерән Ростов-на-Дону балһсна тууҗла таньлдҗ, цаган соньнар давулҗ, хоорндан үр-иньгин залһлда батлв. Марһана ашт 52 өрк-бүл Әрәсән марһанд орлцх зөв авв. ЮФО-н олн һазрас 22 өрк ончрад, дииләчнрин тоод орв. Тедн дунд Хальмг Таңһчин элчнр, өнр-өсклң Боктаевихнә өрк-бүл бәәхнь бахмҗта. Марһана ашлгч девсң Москва балһснд ирх җилин така сарин 8-д өрк-бүлин, дурна болн итклин Өдрлә болхмн.
Боктаевихнә өнр-өсклң өрк-бүл Үстин района Цаһан Амн селәнд бәәнә. Батыр болн Екатерина зурһан үртә, эдн арвн зурһан җилдән ниитә бәәҗ, күүкдтән чик сурһмҗ өгч, района болн таңһчин марһаст шунмһаһар орлцна. Эднә багин ханьд долан күн орв, эннь эк-эцкәсн нань Аюка, Баина, Айтин, Амрхан күүкднь болн Валентина Григорьевна Музганова ээҗнь мөн. Отхн Айтсан болн Аршан көвүднь бас эдниг дахч ирв.
- Марһан өөдән кемҗәнд бүрдәгдв, мадниг сәәнәр тосад, цуһар хоорндан таньлдад цаган сергмҗтәһәр давулхд сән таал тогтав. Мадниг болн дәкәд дөрвн өрк-бүлиг Павел Пискунов тосад, марһана йовудт учрсн ямр нег төрәр селвг өгч, дөрвн өдрин туршарт нөкд болҗав. Өдр болһн олн зүсн керг-үүлдвр болв, марһас давулгдв, терүнә йовудт өрк-бүл болһн ниитәһәр үүлдҗ, билг-эрдмән болн эв-дован үзүлв. Өрк-бүлмүд хоорндан таньлдҗ, белгүдәрн хувалцв. Марһанд орлцсн өрк-бүлмүд цуһар билгтә, седвәртә, ээлтә, халуч зүрктә улс болв, тегәд бидн олн үр-иньгтә болвидн. Өрк-бүл болһн эврәннь келн-улсин сойл, авъяс үзүлҗ, мана орн-нутгт цуһар ниитә бәәдгиг иткүлв. Мадниг хальмг хувцтаһинь үзәд, кесгнь зурган цокулв, мана сойлар соньмсв. Ирх җилд бидн Москва балһснд болх ик марһанд орлцхвидн. Терүнд орн-нутгин булң болһнас өрк-бүлмүд ирхмн, тегәд бидн хальмг улсин нер эрк биш өөдән бәрхәр зүткхвидн, - гиҗ Боктан Екатерина келв.
Марһанд орлцачнр дунд һарсн өдрән темдглсн улсиг онц йөрәҗ, белг белглсмн. Боктаевихнә ууһн Аюка дигтә үкр сарин 13-д һарсмн, тегәд көвүнд белг бәрүлҗ өгәд, цуһар йөрәснь энүг икәр байрлулв. Баахн артист Артем Губинлә болсн харһлт өрк-бүлмүдт бас тодлгдв. Эн Лиана Грибой авальтаһан таньлдсна тускар келәд, эднә өрк-бүлд ямаран авъясмуд бәәдгин тускар хувалцҗ, олн зүсн сүв-селвг өгснь таасгдв. Ростов-на-Дону балһсна тууҗин музейд одснь, Тең һолын көвәд өрк-бүләрн амрснь бас соньн болв.
Боктаевихнә өрк-бүл эн җил өрк-бүлмүд дунд зарлгдсн зургудын марһанд диилвр бәрсн билә. Ода болхла Әрәсән марһанд бас ончрв. Иим керг-үүлдврмүд өрк-бүлиг хамцулҗ, нег-негндән дөң болҗ, хамдан цаган сергмҗтәһәр давулҗ, бат өрк-бүл болхд туслна гиҗ эдн темдглнә. Эдн йириндән, билгтә улс бәәсмн. Ууһн Аюка болн Баина дүүнрән хәләҗ, эк-эцкдән нөкд болна. Эднә өрк-бүлд цуһар билг-эрдмән делгрүлҗ, олн зүсн зевсгт наадна. Екатерина бийнь көгҗмин сурһуль төгсәһәд, домбр цокдг дассмн. Аюка «Богдо» гидг баһчудын төвд ширә деер нааддг теннисәр соньмсна, Баина района көгҗмин сурһульд фортепиано цокдг болн ду дуулдг әңгд сурна. Айтин флейта зесвгәр соньмсв, дәкәд эн робототехникин, теннисин кружокд орна, олн зүсн һарин кегдл кенә. Аюка, Айтин болн Амрхан сул бөк бәрлдәнә секцд орна, эдн зөрмг, чидлтә улс болхар шунна. Һурвн эләд үрнь Цаһан Амн селәнә гимназьд сурна, тегәд сурһульд болдг марһаст, керг-үүлдврмүдт шунмһаһар орлцна. Эдн сурһулян йилһән сәәнәр сурч, марһаст гүн медрлән иткүлнә. Ахнрасн үлгүр авч «Алтн булг» гидг бичкдүдин садт ордг Амрхн, Айтсан болн Аршан һурвн бас билгтә көвүд болҗ өсчәнә. Эднә өрк-бүлд цуһар шүлг айслулҗ умшхдан, дуулхдан дурта. Эк-эцкнь болн зурһан үрнь спортар соньмсад, дууч-биич, һартан өөтә улс болсар, эн марһана даалһврмудыг сәәнәр күцәҗ, ик күцәмҗ бәрҗ дииләчнр болв.
ДООҖАН Наталья

Видео