Гевш лхарамбан өөдән цол зүүв

Сегодня, 17:00 | Общество, Таңһчин зәңгс, Зіњг

Тууҗлгч чинртә йовдл Хальмгин җирһлд учрҗана. Мана һазра көвүн, күндтә Тензин Норзанг (гелң Мукөвүнә Санл) Бурхн Багшин гүн номин хамгин өөдән цол, гевш лхарамбан, ачта цол зүүҗәнә. Энткгин Дрепунг Гоманг хурлд эн ик чинртә шаҗна үүлдвр күцәгдҗәнә.
Үкр сарин 15-д талдан гелңгүдлә хамдан Тензин Норзанг байрин ик мөргүл кев. Хамгин өөдән цол зүүхин өмн кегддг шаҗна үүлдвр номин цуг йосар күцәгдв.
Өрүн эрт Дрепунг Лачи хурлын мөргүлин ик хорад олн гелңгүд хурҗ ирв. Лоселинг болн Гоманг дацңгудас ирсн гелңгүдин то дөрвн миңһнәс давв.
Мөргүлин йовудт Санл гелң Бурхн Багшин Алтн сүмәс ирсн гелңгүдлә болн Хальмг Таңһчас энүг дөңнхәр ирсн олн-әмтнлә хамдан хурлын цуг гелңгүдт бәрцән бәрүлҗ өгв. Эврә һазра көвүнә ик байриг хувалцхар ирсн әмтн цугтан бас ик урмдта йовна.
Дарунь Дрепунг Гоманг хурлын мөргүлин ик хорад шаҗна йосрхлын һол үүлдвр күцәгдв. Гевш-танго гиҗ нерәдгддг мөргүл эн туст авъяс болсн үүлдвр болҗана. Гевшин цол зүүх болсн гелңгүд негдәд, хурлын гелңгүдт ханлтан медүлхәр, мөргүл кеҗ, тооврт цугтаһинь орулҗ, күндллһән медүлв.
Эндр болхла, үкр сарин 20-д, хальмг гелң гевш лхарамбан өөдән цол зүүснд нерәдсн байрин һол керг-үүлдврмүд болхмн.
Гевш лхарамбан өөдән цол зүүхин төлә хальмг гелң Санл цуг шүүврин үүлдвриг давҗ һарсмн. Ах гелңгүдлә болн багшнрла нүүрцҗ, зүткәтә шүүвриг чигн Санл сәәнәр өгв. Гүн номин халхар эврә хәләцән тодрха сәәнәр медүлҗ чаддган, шаҗна номиг арднь орҗ дассан хальмг гелң нәрн зүтклдәнд медүлв.
Бурхн Багшин номин халхар иим өөдән цол зүүхин төлә Санл гелң зөвәр ик дааврта керг күцәсмн. 16 җилдән шаҗна номиг арднь орҗ эн дассмн. Гелуг халхин сурһулин 6 җилә чинвртә шүүвриг давҗ һарсмн.
Дрепунг Гоманг хурлд болҗадг тууҗлгч чинртә йовдлд Хальмг Таңһчин залврин Ахлачин негдгч дарук Цернә Эрднь, Яшкулин района толһач Эдгән Бора болн Лаганя района толһачин дарук Кокшан Валерий орлцҗахнь темдгтә. Таңһчд хальмг гелң Мукөвүнә Санл түрүн болҗ гевш лхарамбан өөдән цол зүүҗәхнь цуг хальмг улсин төлә ик байр-бахмҗ болҗахнь лавта.
ҖИРҺЛИН Кермн

Видео