Эрктнә нутгин дуд седкл байсав

Шидр Элстд Хальмг Таңһчин улсин җаңһрчин нер зүүсн Лиҗ-Һәрән Баатрин 60 җилин өөнд нерәдгдсн «Эрктнә нутгин дуд» нертә концерт болв. Терүнд Баатр Сангаджиевичин Баина күүкнь болн Хальмг Таңһчин ачта артист Шаран Дима орлцҗ, бас билг-эрдмәрн байрлулв.
Концерт үр-иньгин таалд болв гиҗ темдглх кергтә. Лиҗ-Һәрән Баатр нег һазра улсин җирһлд учрсн йовдлмудыг сергәҗ, теднд нерәдгдсн дуд дуулсиг әмтн бүләнәр тосв. Кесгнь тәәз деер һарад, эднә аав-ээҗнрин, эк-эцкнрин туск дуд дуулҗ, теднә нердиг олнд медүләд, өөрхн улсан дәкәд нег тодлх арһ учрснд Баатр Сангаджиевичд ханлтан өргв. Җаңһрчин темдглсәр, дун болһна тууҗиг медх кергтә болна, кенд кезә терүг бичҗ үүдәсиг баһчуд медх зөвтә. Концертд Хар Һазра района әмтн олар орлцҗ, нег һазра билгтиг өөнләнь йөрәв. Дәкәд Баатр Сангаджиевичин Бульҗә Басанговна экнь энд бәәсинь учртан авч, көвүнь «Ээҗин ду» дуулҗ, йирн тавта ээҗдән цецгүд белглснь бахмҗта болв. Көгшә көвүнәннь концертд ирсн улст ханлтан өргҗ, бас хуучн ду дуулв.
«Эрктнә баһчудын дун», «Худ өвгнә дун», «Аавин һанцхн чамдан» болн нань чигн кесг ду әмтн дахад дуулв. Комсомольский селәнд урднь бәәсн Ушадыкан Яван, Ноостан Саһ, Бадм-Һәрән Зурһан, Босхмҗин Уштан, Эрмәлин Төвкә болн нань чигн улсин җирһлд учрсн йовдлмудла залһлдата дуд концертд ирсн эднә үрдтнь болн ачнр-зеенртнь ик бахмҗ үүдәв. Тиигәд, Ноостан Саһин Татьяна күүкнәннь болн Дмитрий ачиннь келсәр, эцкнь болн аавнь Төрскән харсгч Алдр дәәнд зөрмг кевәр дәәлдҗ, хол Сиврин һазрт тусад, ут нас эс наслсн бийинь энүнә нернь мөңкрв. Нег үлү эн җил Алдр Диилврин 80 җилин өөн темдглгдсн цагт Ноостан Саһин туск дун «ЕвразияАртТөв» бүрдәцин һардач Цагадинә Цевгин нилчәр Москва балһсна көгҗмин студьт бичгдснь ончта болв.
Эцкиннь концертд Баина күүкнь орлцснь йоста кеермҗ болад, Bain Ligor гиҗ ниигмин сүлҗәнд нер һарсн күүкн гитар цокч кесг ду дуулв. Лиҗ-Һәрән Баатрин өрк-бүлд цуһар билгтә, ду дуулхдан дурта, олн зевсг татна. Олн элгн-саднь, нег һазра улснь күүкнә билгиг үнлҗ цецгүд белглв. Нертә дууч Шаран Димаг әмтн байртаһар тосад, ормдан сууҗ чадлго босад биилв.
Лиҗ-Һәрән Баатрин 60 җилин өөнд нерәдгдсн концертд күндтә гиичнр ирҗ җаңһрчиг йөрәв. Хар Һазра района муниципальн бүрдәцин толһач Болдра Валерий, Әрәсәд Моңһлын элчллтин сегләтр Онон Чинбаяр, «ЕвразияАртТөв» бүрдәцин һардач Цагадинә Цевг Баатр Сангаджиевичиг «Хальмг Таңһчин улсин җаңһрч» гидг өөдән нер зүүснлә болн ончта өөнлә йөрәһәд, Күндллһнә һашгуд болн белгүд бәрүлҗ өгв. Түрүн болҗ Элстд җаңһрчин концерт бүрдәлһнә седвәр татсн болн дөңгән күргсн Цагадинә Цевгт Баатр Сангаджиевич ханлтан өргв. Нег цусн, нег махн болҗадг Шинҗәнә ахнр-дүүнр ниигмин сүлҗәнә эв-арһар бас җаңһрчиг йөрәснь өврмҗтә болв. Керг-үүлдврин чилгчәр Хар Һазра района улс цуһар тәәз деер һарад, Лиҗ-Һәрән Баатриг дөңнҗ хамдан ду дуулв.
ДООҖАН Наталья