Баахн эмчнр ирснь байрта

Хальмг Таңһчин Толһач Хаска Батун зәрлгәс иштә Буурла Ольга «Балһсна поликлиник» эмнлһнә бүрдәцин ах эмчд батлгдв. Ольга Евгеньевна эн эмнлһнд 2020 җиләс авн көдлҗәнә, дигтә коронавирусн гем түгҗәсн кемд эн шишлң багин ханьд әмтнд дөң күргсмн. Ахр цагин эргцд эмч кергән сәәнәр меддгән, цагин некврлә ирлцҗ үүлддгән, кергән даавртаһар күцәдгән медүлсмн, тегәд хамдан көдлҗәдг үүрмүднь бүрдәцин һардачин үүлд батлсн шиидвриг байртаһар тосв.

Буурла Ольга Лагань балһсна 3-ч тойгта дунд сурһулиг йилһән сәәнәр төгсәһәд, Шарту балһснд В.Разумовскийин нертә ик сурһульд сурсмн. Интернатурт, ординатурт болн аспирантурт сурн бәәҗ Шарту балһсна 5-ч тойгта эмнлһнд көдләд, эн гастроэнтеролог эмч болад, байн дамшлт хоршасмн. 2012 җиләс авн Буурла Ольга П.Жемчуевин нертә таңһчин эмнлһнд көдләд, 2016 җилд гемтә улсиг орулҗ авдг әңгиг һардв. Энүнә седвәрәр болн нилчәр таңһчин эмнлһнд түргн дөң күрглһнә әңг бүрдәгдв. COVID-19 гемтә улст дөң күрглһнә кергиг Ольга Евгеньевна бас һардад, госпитальмудын үүлдвриг диглҗ, эн хальдврта гем илдкҗ авлһна көтлвр күцәсмн. Тавн җил хооран эн балһсна поликлиникд көдлдг болв, энүнә чадмг һардврт гемтә улсас орҗ ирсн эрлһсиг шинҗлҗ дигллһнә көдлмш күцәгдсмн. Тер мет энүнә һардврт Элстд хальдврта гемтә улсин төлә немр әңгүд бүрдәлһнә төр хаһлгдв. 2024 җилд Буурла Ольга Хальмг ик сурһульд сурад, шин мергҗлттә болв. Хамдан көдлҗәдг үүрмүдиннь темдглсәр, Ольга Евгеньевна седвәртә, шин эв-арһс олзлхар шундг, әмтнә сә хәәҗ үүлддг һардач мөн. Дааврта болн кергән сәәнәр меддг, әмтнлә тевчңгү болн цаһан седклтә күн болдг төләдән бүрдәцин көдләчнр дунд тоомср олв.
Одахн гилтә шин үүлд орсн Буурла Ольган нилчәр балһсна поликлиникд долан баахн эмч ирснь темдгтә. Эдн Хальмг Таңһчин эрүл-менд харлһна министерствлә бооца батлад, орн-нутгин ик сурһульмудт сурад, төрскн һазртан күч-көлснә хаалһан эклв. Көкән Байса Москвад И.Сеченовин нертә, Борлга Кермн Әәдрхнә, Мартуна Айса, Мергнә Ольга, Ушана Зулина болн Эрнҗәнә Валерия Ростовск, Увшан Игорь Аһшин ик сурһульмуд төгсәв. Баахн эмчнр эмнлһнә әңгүдт көдлҗәнә, ах үүрмүднь байн дамшлтарн хувалцҗ, эднд дөң-тусан күргҗәнә.
- Мана баахн эмчнрт көдлмштнь күцәмҗ дурдҗанав. Тадн әмтнә эрүл-менд харлһна әрүн чинртә эрдм шүүҗ аввт. Күч-көлснә хаалһтн цаһан болтха, кергән үнн-чик седклтәһәр күцәҗ, төрскн һазртан туста улс болхар шунтн, - гиҗ таңһчин эрүл-менд харлһна министр Саран Булат баһчудыг йөрәҗ күцәмҗ дурдв.

ДООҖАН Наталья
ЗУРГТ: балһсна поликлиникд көдлҗәдг баахн эмчнр