Зулын өмн болдг мөргүлмүд

Намр төгсхдән өөрдхлә Зулын байр өөрдҗ йовхин темдг болна. Бурхн Багшин Алтн сүмд Зулын өмн болдг мөргүлмүд эклҗәнә. Шин җил зөвтән орхин өмн насан утдулх әмтн терүнд орлцҗ чадҗана.
Җил болһн кегддг иим мөргүлмүд эн җил үкр сарин 29-әс авн эклхмн. Дарани мөргүлмүд үкр сарин 30-д болн бар сарин 6-7-д болхмн. Ямр нег учрар тер мөргүлд орлцҗ эс чадсн әмтн бар сарин 13-д хурлд ирҗ, насан утдулҗ чадҗана. Мөргүлмүд ут нас наслхд туслдг һурвн бурхнд - Амитаюс, Ушнишавиджаю болн Цаһан Дәрк бурхдт ном умшгдҗ бүрдәгднә.
Бурхн Багшин Алтн сүмд үкр сарин 29-д ирсн әмтн Цаһан Дәркин номд орҗ, насан утдулхмн. Мөргүл болһнд орсн кен-негнь бурхдын эвәлд күрхмн. Гелңгүдин умшсн ном әмтнә эрүл-мендиг батлҗ, иргч җилд бийән чаңһаҗ орхд туслхмн болҗана. Үкр сарин 30-д Амитаюс бурхна ут нас насллһна ном умшгдхмн. Цаглш уга насни судр гиҗ тернь нерәдгднә.
Ушнишавиджаи бурхна ут нас насллһна бурхна номд бар сарин 6-д орҗ болхмн. Намҗл Бурхна насни чоһа таднд эрк биш туслх. Цаглш уга насни судрин евәлд багтх әмтн бар сарин 7-д Амитаюс бурхна ут нас насллһна мөргүлд ирҗ орлцхмн.
Бар сарин 13-д «Долкар Цедуб» гидг нертә мөргүлд орад, әмтн Цаһан Дәркин насни бүтәлд күртхмн. Зулын өмнк мөргүл болһн өрүн 9 часла эклхмн.

ҖИРҺЛИН Кермн