Алтн намрин сәәхн өдрмүд

Сегодня, 14:49 | Общество, Таңһчин зәңгс, Зіњг

Җилин дөрвн цаг болһн эврәһәрн сәәхн болдг. Намрин кемд хамтхасд шарлад-улаһад, нарна герлд модд алтн болҗ медгдәд нүднә хуҗр хаңһана. Эн җил намр дулан болад, эк-эцкнр бичкдүдән дахулад балһсна паркст амрчахиг үзҗ болхмн. Медәтнр чигн намрин цевр аһар киилҗ, уульнцст болн паркст бод-бод гиһәд йовдгнь үзгднә. Цуһар дулан өдрмүдт зогсчахд байрлҗ, киитртл герин һазак көдлмшән кеҗәнә, балһсна урһмлын эдл-ахун көдләчнр болхла цугинь ахулҗана.
Эн җил бурхн-шаҗна ик хург угтҗ мана хотл балһснд шин хаалһс тосхгдҗ, олн-әмтн амрдг ормс кегдҗ, олн зүсн цецгүд болн модд суулһсн билә. Хотл балһсна төв уульнцсар йовдг хаалһст болн паркд өрк-бүләрн амрхин төлә сән кец-таал тогтагдсиг, шин бумблвс болн фонтанмуд секгдсиг әмтн үнлв. Нег үлү талдан балһсдт сурһулин эс гиҗ көдлмшин халхар бәәдг нег һазра улс нааран ирхләрн мана Элст сәәхрсиг темдглнә. Шүлгчнрин болн туурмҗин аллейд, Манҗин Аркадин нертә талвңд, «Иньгллт» парк күртл бәәдг «экологин хаалһд» ик-бичкн уга амрна, баһчуд энд цуглрна. Сүл җилмүдт Москвад зеенрән хәләҗәдг Эрнҗәнә Байртан келсәр, өсәд-боссн бичкн Элст балһснь иигҗ сәәхрснь байрлулна. Медәт өрүн эрт босад, цевр аһар киилҗ йовһар йовхдан дурта. Ода болхла чик улсин төлә цуг таал бәәнә, паркд цогц-махмудан батрулхин төлә шишлң кергсл углҗ тәвв, йовһар эс гиҗ велосипедәр йовдг салу хаалһс бас кегдв. Асхнднь олн зүсн өңгәр герлтсн панрмуд шатна, тегәд әәмшг угаһар амрч болна.
Келн-улсин төсвәр шинрүлгдсн Басан Городовиковин нертә уульнцд болн энд бәәдг һурвн тагтын өөр-шидр олн зүсн модд суулһгдв. Одахн таңһчин прокуратурин көдләчнр Төрскән харсгч Алдр дәәнә ветеранмудын санлд нерәдҗ Баатрмудын аллейд харһа модд суулһсн билә. Эн кергт дәәнә ветеран Петр Леонтьев болн балһсна 4-ч тойгта дунд сурһулин прокурорск классин сурһульчнр орлцснь темдгтә. Дорас өсч йовдг бичкдүд ачта ветеранла хамдан модд суулһад, энүнә тодлврмуд соңсад, бәәсн һазран кеерүлв. Элстин паркд хуучн модд шинрүлгдҗәхнь, зуни кемд бәәтхә, намрар чигн олн зүсн цецгүд урһҗахнь әмтнд таасгдна. Эн зунар мана паркд хойр кермн иҗлдҗ бәәв. Орс Келн-улсин гимназин сурһульчнр хотынь өгч эдниг асрна.
Элст балһсна урһмлын эдл-ахун көдләчнр эн өдрмүдт төв уульнцст бамб цецгүд суулһҗана. Ут тоодан 60 миңһн бамб цецг эдн суулһад, хавртан балһсна әмтиг болн таңһчин гиичнриг байрлулхин төлә аһу ик көдлмш күцәҗәнә.
Нидн үкр сарин эклцәр түрүн цасн орад, хурта-салькта бүркг өдрмүд бәәсмн. Эн җил иим дулан сәәхн намр болснь нег үлү селәнә эдл-ахуд көдлдг улст туслҗана, юңгад гихлә ода күртл мал кеер идшлҗ йовна. Хур орсна хөөн идгин һазр зөвәр ясрв. Үвлд белдсн хотан әрүнәр олзлҗ, малчнр малан өдртән кеер хәрүлҗәнә. Намр төгсхдән өөрдҗ йовна, удл уга үвл эклхмн.
ДООҖАН Наталья

Видео