Оютнрт корей кел дасхна

Сегодня, 14:51 | Общество, Таңһчин зәңгс, Зіњг

Лаганя района Җалһа селәнд өнр-өсклң бүлд өсәд-боссн Мукөвүнә Жанна (зургт - барунь таласнь) олнд үлгүр болдмн. Бичкнәсн авн дүүнрән, аав-ээҗән арднь орҗ хәләдг билә. Жанна өсәд, гиҗгтә күүкн болад, йисн классан төрскн селәндән төгсәһәд, 10-11-ч классмудт Элстин багшин колледжин улд секгдсн лицейд сурад, цаһан мөңгн медаль авад энүг төгсәсн болдг.
Дарунь эн финансин-экономикин колледжин оютн болад, йилһән сәәнәр энүг төгсәв. Хөөннь Мукөвүнә Жанна Санкт-Петербург балһсна ик сурһулин дорд үзгин шинҗллтин дацңд орҗ сурв. Сурһулян сәәнәр сурдг күүкн 2004 җилд хату цаасан авад, Корей орн-нутг орв. Тенд Тэгу Көн Бук ик сурһульд корей келн-бичгин магистратурт сурн бәәҗ, балһсна һардврин көдләчнрт болн оютнрт орс кел дасхдг болв. Корей болн орс келнә киискврмүдин төрәр магистрин диссертацан харсад, тавн җилдән Сулвон балһсна гимназьд багшлсмн. Тер мет Жанна Алексеевна Корейин дунд сурһульмудын төлә шүүврин даалһврмудыг белдҗ һарһлһнд орлцла. Терүнәс нань корей келәр орс келнә даслурмудын түүрвәчнрин негнь болв. Ут тоодан Корей нутгт арвн шаху җилдән көдләд, байн дамшлт хоршасн болдг.
2013 җилд төрскн орн-нутгтан ирәд, баахн номт Хальмг ик сурһульд көдлдг болв. Мел тиигхд, энд корей келнә әңг секгдв, Жанна Алексеевна эн көдлмшт шунмһаһар орлцв, гиҗ келх кергтә.
Сүл җилмүдт корей келиг, эн улсин тууҗиг болн сойлыг дасхар седҗәдг көвүд-күүкдин то өсәд йовна, баһчуд ирлцңгү төрмүдәр икәр соньмсчана. Хөөннь Хальмг ик сурһульд дорд үзгин шинҗллтин болн африканистикин әңг секгдәд, терүнд корей болн моңһл келиг хамднь дасхдг болв.
2024 җилд Мукөвүнә Жаннан седвәрәр болн энүнә һардврт Хальмг ик сурһульд корей келнә болн сойлын төв секгдсмн. Терүнә ул деер Яшкулин, Лаганя, Ик Буурла райодын, Сарпулин крайин чигн дунд сурһульмудын ах классмудын арвтнр алс-зәәһин эв-арһар корей кел дасдг болв. Тер мет корей улсин авъясин, авг-бәрцин тускар медхин төлә олн зүсн керг-үүлдврмүд давулгдв.
Җил хооран филолог номин доктор, профессор Мушан Владимирин һардврт Жанна Алексеевна «Хальмг болн корей келнд өңг темдгллһнә тускар» гидг төрәр филолог номин кандидатын цол харсв. Терүнәс нань Мукөвүнә Жанна дамшлтан даңгин өөдлүлхәр шунад, ик сурһулин багшнрин төлә бүрдәгддг нарт-делкән болн Цугәрәсән хургудт шунмһаһар орлцдг болв. Сурһулян сәәнәр сурдг оютнрин медрлинь улм гүүдүлхин төлә орн-нутгин кесг балһсдт болдг корей келнә марһаст багш эднән бас йовулна. Дәкәд немхәс, Жанна Алексеевна корей кел дасхдг багшнрин Әрәсән негдлтин гешүн болна, мана таңһчд болхла эн негдлтин әңгин элчәр үүлднә. Негдлтин ханьд Аһш, Ростов, Пермь, Хазн, Уфа болн Элст балһсдын элчнр орна.
Дәкәд темдглхәс, Мукөвүнә Жаннан оютнр Годган Вера, Гонзикә Анира, Манҗин Цаһан, Эрднин Амулң сурһулян йилһән сәәнәр төгсәһәд, зәрмнь эндр багштаһан хамдан көдлҗәнә. Тодлхд, 2016 җилд мана ик сурһуль төгсәсн күүкн Юлия Ким номин халхар нарт-делкән мөрә шүүһәд, Корейин Йонсе ик сурһульд өңгәр сурдг зөв авад, тиигәрән одв. Эндр күртл эн тенд дунд сурһульд багшлна.
Жанна Алексеевнан келсәр, цуг оютнртаһан эн залһлда бәрҗ, эднә төрмүдтнь орлцна. Дәкәд 2020 җилд Хальмг ик сурһульд дорд үзгин шинҗллтин корей келнә әңг төгсәсн 14 күн цуһар улан диплом авсмн билә. Тиигхд, эн ончта йовдлын тускар барин кесг һарцст зәңглгдсмн. Доцент Мукөвүнә Жаннан үгәр, корей кел дасчадг оютнрин дунд сурһулян мууһар сурдг, залху көвүд-күүкд уга болна. Цуһар сәәнәр сурна, эннь йир сән үзмҗ гиҗ заах кергтә.
Кергән үнн-чик седклтәһәр күцәҗәдг багш болсн деерән Жанна Алексеевна эңкр эк болна. Күүкн-көвүн хойртан сән сурһмҗ өгәд өскв. Ууһн Джувон күүкнь эн җилд Элстин лицей йилһән сәәнәр төгсәв. Тодлхас, ЕГЭ-н шүүврән эн сәәнәр өгәд, 200 балл хоршаһад ончрв. Экиннь үлгүрәр дорд үзгин шинҗллтин халхар китд кел дасхар шиидәд, Джувон М.В.Ломоносовин нертә Москван ик сурһулин Азийин орн-нутгудын күрәлңд орҗ сурчана. Каон көвүнь Элстин лицейин нәәмдгч классин сурһульч болна. Иргчдән эн шин эв-арһсин мергҗлт болхар зуралҗана.
Мана редакцин гиич Мукөвүнә Жаннала харһсн кемд эн шидр Владивосток балһснд болсн корей кел дасхдг багшнрин хургас шинкн ирсинь медвидн. Одахн Б.Б.Городовиковин нертә Хальмг ик сурһулин 55 җилин өөнд нерәдсн олн керг-үүлдвр давв. Терүнә йовудт дацң болһнд харһлтс бүрдәгдсмн. Тенд эврә цагтан сурһулян төгсәсн улсла Жанна Алексеевна харһад, оютнриннь күцәмҗин тускар соңсад, бахтҗ байрлв.
КАРСАНА Евгения

Видео