Шин кергсл олзлҗана

П.Жемчуевин нертә таңһчин эмнлһнә физиотерапевтическ әңгд өдгә цага кергсл углҗ тәвгдв. «Salus-Talent», «BTL-6000» болн «Piezo Wave» гидг сән һара кергслмүд олн зүсн гем учрсн кемд эмнлһнд туслна. Иим кергсл урднь энд уга бәәсмн, тегәд ода гемтә улст өөдән чинртә туслмҗ күргҗ, дарунь эдгхд туслх гиҗ әңгин эрүл-менд харлһна көдләчнр темдглнә.

Өдгә цага кергслмүд олн зүсн шарх-шав эдгәхд, месллһнә болн күнд гемин хөөн дарунь эрүл-мендән батрулхд сәәнәр туслна. Эмнлһ авсн улсин келсәр, шин кергслмүд дарунь эдгхд туслсн болна. Боган Олег цусна дарлтнь өөдләд, таңһчин эмнлһнд орсн билә, эн физиотерапевтическ болн реабилитацин әңгүдт эмчнрин хәләврт бәәв. Шин кергсл олзлад, энүнә цогц-махмудынь батрулсна хөөн урднь әмн уга барун һарнь көндрдг болв. Нег күүкд күн удан цагт ишкҗ чадлго тавгнь зовадг бәәҗ. «Piezo Wave» кергсл олзлҗ кесн эмнлһнә хөөн көлнь зовадган уурад, ишкдг болв.
- Хальмг Таңһчин Толһач Хаска Бату болн таңһчин эрүл-менд харлһна министерств өвәрц болн урднь мана эмнлһнд эс олзлгдҗасн кергсл хулдҗ авхд дөң күргснд бидн ик ханлтта бәәнәвидн. Мана таңһчд иим кергслмүд нань уга, түрүн болҗ мана эмнлһнд углҗ тәвгдв. Ода бәәрн әмтн сән чинртә эмнлһ авч, ахр цагин болзгт цогц-махмудан батрулҗ чадхмн, - гиҗ физиотерапевтическ әңгин һардач Шарапа Алла темдглв.
БАТАН Сәәхлә