Антрацитын улсиг дөңнв

Хальмг Таңһч болн Луганск Улсин Республикин Антрацитовск район хоорнд нөкцлтин бооцан батлгдснас авн таңһчин эмнлһнә көдләчнр тиигәрән одад, бәәрн улст дөңгән күргнә. Таңһчин эмнлһнә эмчнрин баг Антрацитовск районд бәәдг 100 һар күүнә эрүл-менд шинҗләд, сүв-селвгән өгнә.

Тиигәрән одсна ашт 7 күүнд мана таңһчин эмнлһнд месллһ кесмн. Сар болһн Хальмгин эмчнр Антрацитовск района эрүл-менд харлһна көдләчнрлә ниигмин сүлҗәнә эв-арһар залһлда бәрҗ, эмнлһнә туст сүв-селвгән өгнә.
Эн өдрмүдт мана таңһчд «Коробка храбрости» гидг буйнч седклин керг-үүлдвр давулгдҗана. П.Жемчуевин нертә таңһчин эмнлһнә ах эмч Чумпинә Саглр терүнд орлцад, удан цагт эмчнрин хәләврт бәәдг бичкдүдт наадһас авч ирв. Цуглулгдсн наадһас таңһчин эмнлһст бәәдг болн Антрацитовск района бичкдүдт йовулгдхмн. «Эмнлһнд удан бәәхд амр биш. Нег үлү бичкдүдт эннь зовлңта болна. Антрацитовск района бичкдүд дарунь эдгәд, эрүл-менд хәрҗ иртхә», - гиҗ таңһчин эмнлһнә ах эмч дурдв.

БАТАН Сәәхлә