Селәнә эдл-ахун көдләчнриг ачлв

Сегодня, 15:29 | Общество, Таңһчин зәңгс, Зіњг

Өцклдүр Элстд селәнә эдл-ахун көдләчнрин байрин хург болв. Хальмг Таңһчин залврин Ахлачин негдгч дарук Шуурһчин Очр, селәнә эдл-ахун министр Гаван Тимур, райодын толһачнр болн АПК-н делгрлтин әңгүдин һардачнр, ирлцңгү бүрдәцсин мергҗлтнр, ветеранмуд болн селәнә эдл-ахун көдләчнр керг-үүлдврт орлцв.
Байрин хургиг Хальмг Таңһчин селәнә эдл-ахун министр Гаван Тимур секв. Тимур Сергеевич эн җилин АПК-н көдләчнрин күцәмҗин тускар тодрхаһар келҗ олнд соңсхв. Эн җил мана таңһчд дәкнәс буудян элвг урһц хурагдв, эннь 851 миңһн тонн тогтав. Терүнәс нань таңһчин эдл-ахуст ут тоодан 190 миңһн туһл, 1,2 сай хурһн авгдв. Һарчах җилин йовудт таңһчин селәнә эдл-ахун министерствин орлцлһтаһар селән һазрт сән кец-таал тогталһна халхар кесг төсвс болн көтлврмүд күцәгдв. Таңһчин райодт бичкдүдин талвңгуд, амрлһна паркс тосхгдв. Терүнәс нань селәнә эдл-ахун халхд йилһгдсн шаңһа дөңгин тускар бас келгдв. Эн җил таңһчин АПК-н халхд ут тоодан 803 сай арслң йилһгдсн болв. Тер тоод мал өсклһнд 498 сай арслң, урһмл урһалһнд болн мелиорацин халхд 117 сай арслң йилһгдсмн. Шаңһа көтлврмүдт 52 күн орлцҗана, кредитин мөңгнә кемҗән болхла 395 сай арслң тогтав, – гиҗ Тимур Сергеевич цәәлһҗ келв.
Хальмг Таңһчин залврин Ахлачин негдгч дарук Шуурһчин Очр цуглрсн олн-әмтиг йөрәҗ, селәнә эдл-аху мана региона һоллгч халхнь болҗахиг дәкнәс онц темдглв. Хальмгин Толһач Хаска Батун йөрәлин бичгиг умшв. «Кезәнәс авн мана өвкнр нүүдл улс болсн төләдән даңгин малын ард йовдмн. Тегәд АПК-н көдләчнр кергән даавртаһар күцәҗ, ик күцәмҗ бәрҗ йовхнь темдгтә», гиҗ бичгт келгдв. Тогтсн авъясар, керг-үүлдврин йовудт көдлмшән үнн-чик седклтәһәр күцәһәд, ончрсн улс Күндллһнә темдгүдәр ачлгдв.
Олн җил хооран сәәһән хәәсн Хальмг Таңһчин селәнә эдл-ахун халхин делгрлтд ик тәвцән орулсн Дорҗин Владимирт Хальмгин Күч-көлснә Баатрин нерн зүүлһгдв. Владимир Павлович насн-җирһлән төрскн һазртан нерәдсн олна үүлдәч бәәсмн. Басан Городовиковин һардврт көдләд, күцәмҗтәһәр үүлдсмн. Арвн һурвн җилдән таңһчин селәнә эдл-ахун министерствиг һардҗ йовла. Чоһран усна тогтал, Хар Һазра цувг, малын хот кеҗ һарһдг, тутрһ урһадг бүрдәцс болн талдан кергүд энүнә һардврт күцәгдсмн. Тер мет тиигхд Ут Сала болн Чаһрт селәдт мөр өсклһнә керг бүрдәгдлә, «Полынный» совхозд болхла хальмг тохма темәд өскдг билә. Ачлвринь энүнә ач күүкн Дорҗин Баирхад бәрүлҗ өггдв.
Тер мет бас сәәһән хәәсн Хальмгин Күч-көлснә Баатрин нерн Социалистическ Күч-көлснә Баатр Очра Александрт зүүлһгдв. Тодлхд, 1974 җилд Александр Борисович Яшкулин района партин негдгч сегләтрт суңһгдв, дарунь партин таңһчин комитетин хойрдгч сегләтрәр үүлдв. Көдлмшән даавртаһар, седклән тәвҗ күцәсн төләдән В.И.Ленинә болн Улан Тугин орденмүдәр ачлгдсн билә.
«Хальмг Таңһчин селәнә эдл-ахун хамгин сән бүрдәц» гисн нерн Хар Һазра района «Первомайский» ПЗ-н АО-д зүүлһгдв. Хальмг Таңһчин Толһачин белг – «Нaval» тамһта машиһәр эн эдл-аху ачлгдв (зургт).
Көтчнрә района «Абсолют» СПСПК таңһчин мал өсклһнә хамгин сән бүрдәц болв. Энд 1650 толһа бод мал багтамҗта бордлһна талвң тосхгдв. Баахн фермер Лиҗин Евгений энүг һардна. Энүнә эцкнь Лиҗин Сергей цергә шишлң керг-үүлдврт орлцҗ йовна. «Лада Гранта» тамһта машиһәр эн бүрдәц темдглгдв.
Урһмл урһалһна халхар Приютна района «Агрофирма Уралан» эдл-аху ончрад, «Нива» тамһта машиһәр ачлгдв. Тер өдр шаңһа болн таңһчин олн зүсн темдгүдәр селәнә эдл-ахун көдләчнр бас ачлгдсн болдг.
Керг-үүлдврин йовудт таңһчин нертә артистнр селәнә эдл-ахун көдләчнрт билг-эрдмән нерәдв.

КАРСАНА Евгения

Видео