Иргнмүдин төрмүдт орлцна

Тавн җил хооран мана таңһчд регионар залдг Төв (ЦУР) секгдв. Әрәсән Президент Владимир Путинә седвәрәр ЦУР-ин әңгүд цуг орн-нутгт секгдсн болдг. Иргнмүдлә өөрхн залһлда бәрхин болн эднә төрмүдт ахр цагин болзгт орлцхин төлә эн Төв бүрдәгдв гиҗ келх кергтә.
– Эндр Хальмгин ЦУР-т төрскн һазриннь делгрлтин төлә көдлҗәдг улс дааврта мергҗлтнр мөн. Эднә нилчәр өдр болһн таңһчд тогтсн бәәдлин тускар медҗ авнавидн. Ниигмин сүлҗәнд барлгдсн зәңгиг шинҗләд, таңһчин балһсдт болн селәдт бәәдг әмтнә нәрн төрмүдт орлцхар шунна. ЦУР-ин көдләчнрт ханлтан өргҗәнәв, цаарандан көдлмшән даавртаһар күцәтн, – гиҗ Хальмгин Толһач Хаска Бату темдглв.

ОЛЬДАН Цаһан