Нарт-делкән ик төсвд орлцҗана

Хальмгин «Җаңһр» наадһасин театрин артистк Эльза Сельвина Әрәсән театрин үүлдәчнрин Ниицәнә төсвд орлцхмн.
«Творческий практикум. Звенигород СТД РФ» гиҗ нерәдгдсн нарт-делкән сурһуль-эрдмин гидг төсвд орлцх зөв хальмг артистк Эльза Сельвинад учрв.
«Нарт-делкән сурһулин лабораторь» гидг көтлврт кесг орн-нутгин театрин артистнр орлцҗана. «Творческий практикум. Звенигород СТД РФ» гиҗ нерәдгдсн эн керг-үүлдвр бар сарин 8-әс авн 14 күртл болхмн.
Әрәсән, Казахстана, Узбекистана, Беларусин, Түргин, Италин, Иорданя, Арменя артистнр дунд кегдсн шүүвриг 40 артист давҗ һарв. Тедн дунд Хальмгин «Җаңһр» театрин артистк Эльза Сельвина эн лабораторин көдлмшт орлцх зөв авв. Немәд келхлә, эн артистк «Маленький принц» гидг театральн студин багш болҗ үүлднә.
Актерск билг-эрдмән улм өөдлүлхд туслх дамшлт лабораторин орлцачнрт учрхмн. Тәәз деер эвтә-довтаһар көндрдгиг, генткн шин даалһврас иштә нааднд сольвр орсн цагт тер дарунь дүриг талданар үзүлхд белн болдгиг артистнр дасхмн. Эднә багшнр Настасья Чуйкова-Любарская, Илья Оши болн Анна Августинова тиим ахр цагин болзгт артистнриг тәәз деер учрҗадг цуг шин тоотла таньлдулҗ, цуг терүгинь эврә үүлдвртән яһҗ олзлҗ болдгиг дасхмн.

ҖИРҺЛИН Кермн