Дала Ламин көгҗмин альбом

«Медитации: размышления Его Святейшества Далай-Ламы» гидг альбом «Грэмми» көгҗмин мөрә авх марһана ашлгч девсңд орсн зәңг шидр ирв. Җил болһн эн мөрән аш диглгднә. Эн җилд җирн нәәмдгч кемдән болҗадг мөрән ашлгч үүлдвртнь Дала Ламин көгҗмин альбом заагдснь йир соньн болв. «Лучшая аудиокнига и повествовательная запись» гидг әңгд Дала Ламин төсв темдглгдҗәнә. Җил болһн болдг мөрән дииләчнриг Лос-Анджелес балһснд 2026 җилин лу сарин 1-д ачлхмн.
Дала Ламин Гегән бәәдл -җирһлиннь болн шаҗна үүлдвриннь тускар баһ биш үүдәврмүд бичснь темдгтә. Тернь кесг келнд орчулгдҗ, миңһәд улсин оньгт тусхагдсн болв. Күңкл Багшин җирһлин үлгүр, терүнә ухан-тоолвр олн умшачнрт орчлңгин туск медрлән гүүдүлхд, җирһлдән чик шиидвр авхднь туслҗана. Орс келнд чигн Дала Ламин үүдәврмүд орчулгдснь темдгтә. Гүн тоолврта тер дегтрмүдиг Валентин Гафт болн нертә нань чигн артистнр умшҗ, олнд медүлсмн.
Көгҗмчнрин оньгт туссн эн альбомиг Дала Ламин гегән Энткгин нер туурсн көгҗмч Амджаду Али хаанла белдсн болдг. Оюни эн үүлдвртнь Али хаана көвүд Амаан Али Бангаш болн Аяан Али Бангаш хойр тер альбом белдлһнд орлцсмн. Келхәс, эн төсв йосндан соньн болҗ. Дала Ламин Гегән өр-өвч седклин, эвин болн күн болһна ухан-седклд орман олдг олн тоолврарн хувалцҗахнь йир соньн мөн. Күңкл Багшин тоолвриг дахулад, Энткгин әмтнә көгҗмин зевсгин - сародин айс орулгдснь бас өвәрц юмн.
Эн альбом белдлһнд нертә талдан артистнр бас орлцв. Тернь – альбомин продюсер Кабир Сегал мөн. Эн нертә көгҗмч бийнь «Грэмми» мөрән дииләчин нериг кесг дәкҗ зүүсн билгт болҗана. Кабир Сегалын темдглсәр, Дала Ламин альбом гүн тоолврарн әмтнә оньг авлх чинртә үүдәвр болҗана. Алдр Багшин тоолврин күмнд туста тоотынь Амджад Али Хан дигтә сәәнәр дахулсн көгҗмәрн медүлҗәнә. Эн төсв Дала Ламин Гегәнә цецн ухани тоолвриг көгҗмлә ниицүлсн седкл авлгч үүдәвр болҗана.
«Медитации: размышления Его Святейшества Далай-Ламы» гидг альбом маднд йир хәәртә төсв болв, - гиҗ төсвин продюсер ухан-тоолвран медүлв. - Күңкл Багшин келсн тоот күн болһна седклд күрнә. Тоолвринь дахулсн айсмуд келсн тоотын тускар ухалх седкл орулна. Цуг эннь нииләд, җирһлдән олзлх олн тоотыг медҗ авхд туслна.
«Грэмми» мөрә көгҗмин халхд хамгин ик чинртә мөрән тоод орна. Кинод темдглгддг «Оскарла» терүг әдлцүлҗ болхмн.
Дала Ламин көгҗмин альбомиг мөрән әңгд заасн йовдл делкән сойлд шаҗна эн үүлдәч орулсн тәвцинь темдглсн деерән эн альбомар дамҗад делкән саяд улс эн орчлңд кен-негндән нөкд болҗ бәәлһн ямаран ик чинртә болхнь эвин бәәдл тогталһн цугтад кергтәһинь медҗ авхд туста болхнь маһд уга. Оюни эн йовдл цуг делкәд хүврлтс учраҗ, кен-негән медлцҗ, эвин бәәдлд бәәхд туслх гисн ицл үүднә.
УШКАНА Сувсн