Экин седкл - үрнд

29-11-2025, 13:40 | Общество, Таңһчин зәңгс, Зіњг

Кезәнәс авн хальмгуд дунд эн цецн үлгүр келгдҗ йовна. Насн ирх дутман эн үлгүрин учр-утхнь улм сәәнәр медгднә. Экиннь тускар, тоомсрта багш болн күч-көлснә ветеран Бадмин Галинан тускар ууһн үрнь Кичгә Игорь келҗ өгв.
- Бичкнәсн авн экин килмҗд өссән тодлнав. Цуг тоотым дигләд, ямаран йовхим шинҗлсн экинм килмҗиг мартҗ болхий. Нанд, мини дүүнрт экм тиигәд оньган өгәд, таалад, медмҗән угаһар сурһмҗ өгәд йовснь ода уханас һархш. Эцктә хоюрн эдн хоорндан йир ниитә бәәдмн. Өөрән дахулад, герин көдлмш кедгиг, бийән цеврәр, дигтә-даратаһар бәрдгиг дасхсмн.
Бәәрн селәнә сурһулин хальмг келнә багш болҗ олн җилд мана эк Галина Саранговна көдлҗ йовла. Олн сурһульчнриг җирһлин хаалһд орулсн мана эк селәндән күндтә билә. Бидн үрднь экин нериг муурулшгоһар сурһулян сәәнәр сурч, олна үүлдврт орлцҗ йовлавидн. Көдлмштән муурсан мана эк медүлдго билә. Мана сурһулин тускар соньмсад, кичәлдән белдлһнд нөкд болҗ йовла.
Герин эргндк көдлмшиг мана эцк кех, гер дотрк тоот экин һарт бәәдмн. Тиигәд бидн бичкнәсн авн өрк-бүләрн ниитә бәәҗ, цугинь хамдан кеҗ өсләвидн. Альднь болв чигн маднд эк-эцк хойр үлгүр болдмн. Намаг ик сурһульд орх цаг ирхлә, экм намаг дахулад сурһуль сурх һазрт күргәд, бәәх орм дигләд, цуг кергтә цаасиг белдәд, нерән һуталго, сурһулян сәәнәр сур гисн заавран өгснь мартгдхш. Тиигәд сурһуль сурчасн цагтм экм гертәсм сенр хот-хол илгәдг билә. Нанла хамдан сурчасн күүкд-көвүд мини экин хотын амтиг ода күртл мартхш, харһх болһндан тодлна.
Цаг давад, мини дүүнр өсәд, тедн сурһуль сурх кем ирхлә, эс гиҗ дааврта нег керг күцәсн цагтнь би экиннь үлгүрәр тедниг дахулад, нүдн-амн болҗ йовлав. Ода мана үрд тиигәд кен-негндән дөң болҗ, ниитә бәәнә. Аав-ээҗин үлгүриг эдн мартхш. Тедн эврә үрдтән, ээҗин ачнр-зеенрт, тер сурһмҗ өгч, өрк-бүлин ик чинртә күчиг медүлнә.
Бидн цугтан ик хөвтә улс болҗанавидн. Ода күртл зурһан үрнь, маднас һарсн ачнр-зеенрнь, мана тохмин нериг цааранднь дуудулх җичнр болн зеенчр бичкдүд цугтаһинь эк-ээҗ килмҗлҗ хәләнә. Сән Өдрлә эңкр экән, өр-җөөлн ээҗән Галина Саранговнаг үнн седкләсн йөрәҗәнәвидн.

Видео