Көгҗмин дүүрәнд...

Сегодня, 13:52 | Общество, Таңһчин зәңгс, Зіњг

Петр болн Любовь Чонкушовихнә герин тускар әмтн тиигҗ келдг билә. Генткн чееҗинь дүүргҗ, күңкнҗ ирдг айсмудыг фортепианод, баянд эс гиҗ талдан нег зевсгт орулхар адһдг Петр өдрәр чигн, сөөһәр чигн көгҗм татҗ, өөр эргндкиг шуугулдмн.
Болх-болшго цагла көгҗмин әәһәрн әмтнд амр өглго бәәхинь меддг Любовь авальнь хоша бәәсн улсиг эргәд, эртәснь теднлә күүндәд: «Петр Очирович көгҗм һарһҗана, невчк тестн, бичә уурлтн», - гиһәд үгцәд авчкдг билә.
Алдр күүнә арднь даңгин күүкд күн йовна, гиҗ кезәнә нег ухатл келсн болдг. Чоңкуша Петрин – Хальмгин түрүн көгҗмчин, билгәрн делкәд нер һарч Америкд нернь һарсн хальмг билгтин иньгнь, омгнь, түшгнь, нөкднь Любовь Георгиевна бәәсмн. Баһ насндан дурни евәләр нег-негән олсн эн хойр таңһрг җирһлин амр биш хаалһ давҗ һарсмн. Баянан үүрсн Петр Любаг тосхар ирәд бәәҗ, эдн седклән медлцсмн. Көгҗмәс нань талдан юмнд оньган икәр өгдго Петр тиигәд Любан килмҗтә хәләврт орв. Ямаран ик хөв терүнд учрсинь җирһл медүлв. Омск балһсна шог көгҗмин театрас авн Хазна консерваторәр дамҗад, «Җаңһр» опер-балет үүдсн цаг күртл эдн һар-һаран бәрлдҗ, ээм-ээмән түшлдҗ җирһлин хаалһар йовсмн. Көгҗмин шин үүдәврмүдт туслҗ, түрүн соңсачнь болҗ йовсн Любовь Георгиевна алтн дөрвн үрән өскәд, көгҗмин хаалһд орулсмн. Маргарита күүкнәннь тодлсар, тииглго бәәшго билә, бидн экин килмҗтә хәләврт өсләвидн гинә.
Аавин билг ачднь, баһ наста Чоңкуша Петрт күртҗ (зургт). Аавин нер зүүсн, ээҗин өр-җөөлн килмҗд өссн Петр ода нер туурсн хуурч болҗ, делкән хамгин ик кесг тәәз деер һарч йовна. Көгҗмин бульглсн дүүрәнд бәәсн эн хөвтә өрк-бүлин үлгүрәр дамҗад энкр авалин, килмҗтә экин, таалта ээҗин евәл эднә кишгин ул болҗахиг үзҗ болхмн.
Экин сәәхн байрла Любовь Георгиевнаг бидн йөрәҗәнәвидн.

Видео