Нимгр ээҗин 100 алтн намр

Сегодня, 14:04 | Общество, Таңһчин зәңгс, Зіњг

Шидр, үкр сарин 20-д, өнр-өсклң Манджиевихнә өрк-бүлд ончта болн ик байрта йовдл учрв. Ачта ээҗ Нина Горяевна 100 җилин өөнән темдглв. Экин Өдр угтҗ сәәхн өөнән темдглсн медәтиг күүкднь, олн ачнр-зеенрнь, җичнрнь болн элгн-саднь йөрәҗ, сергмҗтә харһлт бүрдәв.
Ээҗин хальмг нернь Нимгр мөн. Үстин района Татал селәнд бәәдг Кирилаевихнә өрк-бүлд 1925 җилин үкр сарин 20-д күүкн һарсмн. Дигтә дән эклхин өмн эн сурһулян төгсәһәд, эмчин эрдм дасхар зуралҗасмн, болв тер санань күцсн уга. 1941 җилин намрар эцкнь дәәнд мордв, ардаснь Эрнҗән ахнь төрскн һазран хортнас сулдххар йовв. Экән эрт геесн Нимгр көгшн ээҗән болн Санҗ-Һәрә дүүһән хәләдг болв, эрт күч-көлснә хаалһан эклв. Хальмг улсиг цааҗла харһулхла эдн Красноярск крайд тусв, тенд ямаран күчр зовлңла харһсн болх гинәт! Өрк-бүлән үкләс харсч авхин төлә Нимгр урһа модд белдлһнд көдлв, хөөннь энүг сурһультаһинь медәд, тоочин көдлмшт авсмн. Сиврин һазрт баахн Нимгр Манҗин Григорийлә таньлдад, өркән өндәлһв. Төрскн һазрурн хәрх зөв өгхлә, эдн өрк-бүләрн Үстин района Цаһан Амн селәнд ирҗ бәәв. Нина Горяевна олн җилдән района хулд-гүүлгәнә халхд көдләд, тавн җилә зураг давулҗ күцәҗ нүүрләчнрин тоод йовсмн. Григорий Натырович авальтаһан тәвн шаху җилдән ниитә бәәҗ, дөрвн үрән асрад, кү кев. Любовь, Александр болн Владимир эрүл-менд харлһна көдләчнр болв, Галина күүкнь таңһчд үүлддг хазна заллтд, тосхлтын бүрдәцд тооч болҗ олн җилдән көдлв. Эндр Нимгр ээҗ йисн ач-зееһиннь болн нәәмн җич-зеенчиннь кишгт багтҗ бәәнә.
- Мана ээҗ цаһан саната, делкә мини гисн у-өргн седклтә, һольшг күн мөн. Эн өдр болһн өрүн-асхнд маань умшҗ эркән эргүлҗ көрстә һазр деер бәәдг әмтн зовлң, дән-даҗг уга ниитә бәәтхә гиҗ зальврна. Бидн бичкндән чигн зуни амрлһна кемд ээҗ-аавдан бәәдг биләвидн. Мана ээҗ һартан бәрсән кедг, эвтә, билгтә, маднд олн зүсн ке-сәәхн хувц уйҗ өгәд кеерүлдг бәәсмн. Дәкәд мана ээҗ дууч-биич күн, тегәд района керг-үүлдврмүдт орлцҗ билг-эрдмәрн нер һарч йовла. Җирһлин хаалһдан дәәнә болн тууврин зовлң үзсн бийнь мана ээҗ әмтнд мел дөңгән күргхәр зүткдмн. Ачта ээҗмдн 100 алтн намр үзҗ, күүкдтән, ачнр-зеенртән болн җич-зеенчнртән нарн болҗ йовтха гиҗ дурдҗанавидн, - гиҗ Баира зе күүкнь келнә.

Зургт: таңһчин Толһач Хаска Бату
көгшәг йөрәв

Видео