Тааста кергән делгрүлҗәнә

Сегодня, 14:09 | Общество, Таңһчин зәңгс, Зіњг

Мана орн-нутгт баһ тетквртә, җирһлин күнд таалд туссн улс социальн бооца батлад, олз-оруһан икдүлҗ, өрк-бүлән теҗәхин төлә шаңһа дөң авч чадна. 2021 җиләс авн күцәгдҗәдг көтлврт мана таңһчин әмтн бас орлцхар шунҗахнь байрта. Эн цагин эргцд 1,4 миңһн күн шаңһа дөң авад, эврә керг бүрдәв, онц эдл-аху бәрдг болв, 700 күн көдлмш олҗ авв. Шаңһа дөңгиг олзлад эврә керг бүрдәсн улс дунд Яшкуль селәнд өсәд-боссн Баджан Александр (зургт) бахмҗ үүдәнә. Олн үртә эцк тааста эрдмәрн керг бүрдәһәд, олзта-орутаһар көдлҗ, цааранднь терүг делгрүлхәр зуралҗана.
Саша Алексей ахтаһан бичкнәсн авн эцкән дахад, көлгнә зи соляд, ямр нег эвдрсн тоотынь ясад нөкд болдг бәәсмн. Кичәлмүдин хөөн көвүд герин көдлмш кеҗ, цаган тустаһар давулдг мөн. Владимир Бадмаевич хойр көвүһән маши залдг чигн дасхв. Эцкнь эднд чик сурһмҗ өгч, ямаран чигн көдлмшәс әәлго, бәрсән кедгиг, һартан эвтә болхиг дасхад, медсән зааҗ өгсмн. Ода болхла Александр эврән дөрвн үртә эцк болад, һурвн көвүндән бас көлг ясдгиг дасхч өскчәнә. Эрднь, Алтн болн Басң көвүднь эцкән дахад, өөрнь сул цаган давулна. Эцкнь социальн бооца батлад, эврә керг секхин төлә шишлң бәәр тосхсн цагтнь көвүд дөңгән күргснь баахн залуд ик урмдта болв.
- Района әмтнә социальн харслтын цергллтлә социальн бооца батлад, шаңһас мөңг авч болхин тускар би нег таньл күүнәс соңслав. Сүл һурвн җилин эргцд эврә керг бүрдәхин тускар ухалҗ йовлав, болв терүнә төлә кергтә мөңгн уга билә. Социальн харслтын цергллтин мергҗлтнр ямаран цаас авч ирхин тускар цәәлһҗ өгснә хөөн кергин зура белдәд, бәрмт цаасд цуглулад, комиссин шиидвриг күләвв. Дарунь нанд эврә керг бүрдәхд зөв өгәд, шаңһас 350 миңһн асрлңга демин мөңг йилһҗ өгв. Хам-хоша бәәдг Әәдрхн балһснд одад, көлгнә төгәс сольдг, ясдг туслмҗ күргхин төлә кергтә кергсл хулдҗ авлав. Мана селәнә захар шаңһа хаалһ давна, тегәд тенд һазрин әңг хулдҗ авад, кергән эклсн болдг. Социальн бооца батлад, җил давв, мини керг му бишәр делгрҗәнә. Эн ахр цагин эргцд Яшкулин района бәәтхә, хам-хоша бәәдг Хар Һазрас чигн әмтн ирҗ дөң болхиг сурна. Хаалһар давҗ йовдг җолачнрт чигн бас туслмҗан күргнәв. Өрүнднь күүкдән сурһульднь, бичкдүдин садт күргчкәд, нааран ирнәв. Зәрмдән асхн ора күртл көдлх кергтә болна. Малчнр өдртнь цаг бачм болад, асхар ирнәвидн гиҗ сурна, тегәд теднд көлгинь ясад, төгәһинь сольҗ дөң болнав. Тааста эрдмәрн кергән секәд, олзтаһар көдлҗ өрк-бүлән теҗәдг болсндан байрлнав. Эврән эн кергиг бүрдәҗ чадшго биләв. Баһ тетквртә улсин төлә иим көтлвр батлгдснь йир сән, терүнд эрк биш орлцх кергтә, - гиҗ Баджан Александр келнә.
Бичкнәсн авн эцкиннь нилчәр көлг ясдгиг дассн залу күн тааста эрдмәрн керг бүрдәҗ олзтаһар көдлҗәнә. Ода эн кергән делгрүлҗ көлг ясдг гараж тосхчана. Олн зүсн туслмҗ күргхин төлә дәкәд немр кергсл хулдҗ авх кергтә гиҗ Александр келнә. Ууһн Эрднь ода оютн, амрлһндан ирхләрн эцкдән нөкд болна. Арвта Алтн болн йистә Басң сул цаг бәәхлә бас нааран ирҗ тосхлтын көдлмшт нөкд болна, эдн альк нег зи сольхин төлә ямаран кергсл кергтә болдгиг сәәнәр меднә. Көвүд эцкән дахад, бичкнәсн авн чик сурһмҗ авх зөвтә гиҗ залу күн тоолна. Отхн Эркина күсдундур наста, эк-эцкнь болн ахнрнь күүкнд цань уга эңкр болна. Баира авальнь района эмнлһнд көдлнә, эн герин эзнь тааста кергән күцәҗәхиг дөңннә. Өнр-өсклң Баджаевихнә өрк-бүлин керг олзта-орутаһар делгрҗ йовтха гиҗ дурдҗанавидн.

ДООҖАН Наталья

Видео