Ачта экнриг йөрәҗ магтв

Сегодня, 10:25 | Общество, Таңһчин зәңгс, Зіњг

Давсн долан хонгин чилгчәр Элстд экин Өдрт нерәдсн байрин хург болв. Олн үртә, таңһчин олна бәәдл-җирһлд шунмһаһар орлцдг, көвүднь цергә шишлң керг-үүлдврт орлцҗадг экнр, таңһчин болн Әрәсән марһаст күцәмҗ бәрсн өрк-бүлмүд терүнд орлцв.
Хальмг Таңһчин Толһачин һардврин ахлачин негдгч дарук Тарбан Савар сән өдрин байрла цугтаһинь йөрәв. Хальмг Таңһчин Толһач Хаска Батун илгәсн йөрәлин бичг умшад, төрскнч седклтә, арһта, үнн-чик седклтә улсиг асрсн экнр мана бахмҗ болдгиг темдглв. Мана таңһчд үрдтән чик сурһмҗ өгдг, олн дунд күндллһ олҗ, олна бәәдл-җирһлд шунмһаһар орлцдг, эврәннь кергән күцәмҗтәһәр делгрүлҗәдг күүкд улс баһ биш бәәнә.
2011 җиләс авн мана таңһчд тавн болн терүнәс үлү үр асрсн өрк-бүлмүдиг «Күүкдтән чик сурһмҗ өгсн төлә» гидг темдгәр ачлдг болв. Эн җилмүдин эргцд 270 һар өрк-бүл өөдән ачлврар темдглгдв. Урднь ачлгдсн өрк-бүлмүдт 50 миңһн арслңга мөрә өгдг бәәсмн, ниднәс авн терүнә кемҗән 100 миңһн арслң болв. Эн җил дәкәд 11 өрк-бүл эн темдгәр ачлгдв, Тарбан Савар эднд ачлвринь бәрүлҗ өгәд, сән өдрлә йөрәв. Ачлгдсн эк-эцкнр дунд Целинн района Троицкое селәнд бәәдг тавн үртә Санл болн Любовь Кадаевихн билә, эдн 2022 җилд «Җилин сән гисн өрк-бүл» гидг Цугәрәсән марһана таңһчин девсңд диилвр бәрсмн. Руслан болн Сацита Темуркаевихн Городовиковск районд бәәнә, эдн 7 үр өскчәнә. Герин эзн ода цергә шишлң керг-үүлдврт зөрмг кевәр дәәлдҗ йовна, тегәд экнь болн авальнь байрин хургт ирҗ ачлвран авв. Үстин районд бәәдг Һәрә болн Марина Сокалиевихн бас тавн үртә, эдн күүкдтән чик сурһмҗ өгч, арвн һурвн җилдән ниитә бәәнә. Һәрә Бадмаевич ода бас цергә даалһвран күцәҗ йовна, зөрмг эцк күүкдтән үлгүр болна.
Хальмг Таңһчин Улсин Хуралын (Парламентин) Ахлач Артем Михайлов экнриг болн ээҗнриг сән өдрин байрла бүләнәр йөрәҗ, шүлг айслулҗ умшв. (зургт) Әрәсән Президент Владимир Путинә даалһврар «Эк баатр» шаңһа ачлврар темдглгдсн күүкд улс «Күч-көлснә Баатр» гидг цол зүүҗәдг улсла әдл зөвтә болхмн. Әрәсән Орн-нутгин Хүүв һурвдгч умшлһндан эн шиидвриг батлсна ашт 2026 җилин туула сарас авн эн зөв экләд үүлдхмн гиҗ Артем Васильевич келв. Таңһчин күүкд улсин ниицәнә седвәрәр мана таңһчд эн җиләс авн олн үртә өрк-бүлин Өдр темдглдг болв. Хальмг Таңһчин Толһач Хаска Батун шиидврәр эн сән өдрлә түрүн болҗ олн үртә өрк-бүлмүд 50 миңһн арслңга мөрә авв гиҗ зака үүдәгч хургин ахлач темдглв. Экин сән өдр угтҗ Алексей болн Ада Ланг, Лиҗ болн Буйнта Тепшиновихн, Пүрвә болн Наталья Артаевихн, Батор болн Анна Потаевихн хальмг Таңһчин Улсин Хуралын Ахлачин Ханлтын бичгәр ачлгдв.
«Җилин сән гисн өрк-бүл» Әрәсән марһанд диилвр бәрсн Баатр болн Надежда Талтаевихн болн «Энтн мана өрк-бүлин авъяс» гидг орн-нутгин марһана ашлгч девсңд ончрсн Батыр болн Екатерина Боктаевихн зурһан үртә эк-эцкнр болна (зургт). Хальмг Таңһчин залврин Ахлачин негдгч дарук Цернә Эрднь эдниг диилвр бәрснләнь йөрәһәд, үнтә белгүд бәрүлв. Эрднь Николаевич олн үртә Дорджиевихнә, Манджиевихнә, Серкишевихнә, Кравченкон болн Эрдни-Горяевихнә өрк-бүлмүдиг Хальмг Таңһчин залврин Ханлтын бичгәр ачлҗ йөрәв.
«Байн тег» болн «Веснушки» бичкдүдин бииһин ансамбльмуд, нертә дуучнр хургт орлцачнриг билг-эрдмәрн байрлулҗ, седкл байсав. Сән өдрин хургт Төрскән харсгч Алдр дәәнә ветеран Петр Леонтьев орлцсиг цуһар байртаһар тосв.

Батан Сәәхлә

Видео