Махн кимдәр хулдгдв

Сегодня, 12:39 | Общество, Таңһчин зәңгс, Зіњг

Тогтсн авъясар селәнә эдл-ахун көдләчнрин сән өдрлә ирлцүләд, җил болһн намрар Элстд хот-хоолын яарм болна. Шидр балһсна Диилврин талвңд селәнә яармд олн-әмтн ирҗ, тааста хот-хоолан хулдҗ авв. Хальмгин селәнә эдл-ахун министерств энүг бүрдәсн болдг.
Бембә өдр өрүн эртәс авн таңһчин райодын арһлачнр мах, заһс, тәрә-темс болн талдан хот авч ирв. Махна болн талдан хот-хоолын үн лавксин болн базрин үнәс зөвәр кимд болв. Яармд нурһлҗдан махн болн махна зүүтә хот-хол хулдгдв. Хөөнә махн 490 арслңгар, үкрә махн болхла 450 арслңгар хулдгдснь ик чеерүд учрав. Тер мет яармд заһсн, икцарңга тутрһ, боднцг бас хулдгдв.
– Бидн Троицкое селәнәс авальтаһан хамдан мах авхар ирвидн. Хөөнә махн зөвәр кимдәр хулдгдҗахинь үзәд алң болвидн, юңгад гихлә эндр базрт махна үн зөвәр ик болна. Тегәд хөөнә хойр көл хулдҗ аввидн. Үдин хөөн нег көлинь чанад, үрдән болн ачнр-зеенрән дуудад тоохвидн. Үлдсн көл махинь Зул күртл үлдәхмн. Терүнәс нань Октябрьск районд урһагддг сән чинртә тутрһ бас хулдҗ авлавидн, – гиҗ медәт Санҗин Кермн тоолврарн хувалцв.
Тер мет яармд Лаганя районас авч ирсн заһсн үзгдв. Көрә, хатасн болн давслсн заһс хулдҗ авч болхмн билә. Ик Буурла района Зултрһн селәнәс авч ирсн боднцг 35 арслң күрв. Әмтн үвлд белдәд, мишгәрнь чигн хулдҗ авчав. Ростовин мүҗәс махна зүүтә хот-хол хулдгдв. Нальчик балһсна арһлачнр шовуна мах авч ирҗ.
Приютна района АПК-н делгрлтин әңгин ах мергҗлт Юрий Мирошниченкон келсәр, эднә района арһлачнр җил болһн яармд шунмһаһар орлцна. «Агрофирма Уралан» эдл-аху үкрә 300 килограмм мах авч ирв (зургт). Терүнәс нань талдан эдл-ахус хөөнә, шовуна мах бас хулдҗахнь үзгдв.
Хальмг Таңһчин селәнә эдл-ахун министр Гаван Тимур яармд орлцсн арһлачнрт ханлтан өргв. – Эврәннь эд-тавран хулдсн деерән тадн орн-нутгин хот-хоолын әәмшг уга бәәдл тогталһнд тәвцән орулҗ, тер мет таңһчин АПК-н делгрлтд туслҗанат, – гиҗ Тимур Сергеевич онц темдглв.
– Хальмг теегт идшлсн малын махн йир шимтә, тарһн, әмтәхн болдг. Тегәд махн невчкн кимдәр хулдгдсн төлә әмтн ханлтта бәәнә. Тиим яармд иргчдән чигн орлцх саната бәәнәвидн, – гиҗ арһлач Эрднин Ирина келв.
Темдглхд, эн җилин намрин яармд махн икәр хулдгдснь әмтиг икәр байрлулв.
БАДМИН Занда

Видео