Фермерин хошт одад…

Сегодня, 12:43 | Общество, Таңһчин зәңгс, Зіњг

Намрин сүл сарин дундурар малчнрин төлә үвлзлһнә хамгин дааврта кем эклв. Тегәд таңһчин фермермүд малын өвс-тоосинь зөөҗ орулад, эртәснь белдв.
Хальмгин селәнә эдл-ахун министерствин зәңглсәр, таңһчин эдл-ахуст 320 миңһн һар толһа бод мал, 1,5 миңһн һар хөн, 1000 шаху темән үвлзлһнд орв. Цуг эдл-ахуст малын хот белн бәәнә. Эн җилин намр зөвәр дулан болад, мал өдртән теегт идшлв, эннь малын хот хадһллһнд туслв гиҗ келх кергтә. Ветеринарийин халхар бас ирлцңгү керг-үүлдврмүд цаглань күцәгдв.
Шидр Целинн района Ик Чонс селәнд эврә эдл-ахуһан бүрдәсн Мөңкән Алексейин хошт одад, үвлзлһнә кемд яһҗ белдсәр соньмсвидн.
Алексей Леонидовичин келсәр, эн җилин үвлзлһнд эн малднь кергтә шүрүн хот, көк өвс болн салм белдсн болв. Тер мет цевр усар, тосн-түләһәр бас күцц кевәр теткгдв. Ветеринарн керг-үүлдврмүд бас цаг-болзгнь күцәгдсмн.
Үвлзлһнә төрәр таңһчин район болһнд шишлң штаб бүрдәгдв. Энүнә гешүд селәнә эдл-ахун бүрдәцст, КФХ-ст болн ЛПХ-ст үвлзлһнә кем яһҗ давҗахинь бүрткнә. Тер мет Целинн района АПК-н делгрлтин әңгин мергҗлтнр бәәрн һазрт йос заллһна бүрдәцсин толһачнрла болдг харһлтст үвлзлһнә бачм төрмүдиг хаһлна.
Хөрн җил хооран Мөңкән Леонид крестьянск-фермерск эдл-аху бүрдәһәд, бод мал болн хөд өскдг болв. Эндр болхла Алексей көвүнь кергинь цааранднь давулҗана. Энүнә эдл-ахуд асргдҗадг малын чинәнь му биш гиҗ темдглхмн. Намрин дулан өдрмүд туслҗана, гиҗ малч келнә. Хошть эврә шишлң көлгн бәәнә. Эннь ус болн аца зөөдг машид, трактор мөн. Терүнәс нань малч цөөкн така бәрнә. Тегәд махнь, үснь, өндгнь эврә болад, гертксинь байрлулна.
Мөңкән Алексей эврә хоштан өдгә цагин некврлә ирлцҗәдг сән гер тосхв, нам балһсна гер-бүүрәс юуһарн чигн дуту биш. Газин шишлң кергсл углҗ тәвснә ашт гертнь йир дулан гих кергтә. Урднь болхла бешән арһсар түлдг билә, эндр болхла кеер хошт чигн сән кец-таал тогтахд цугнь бәәнә, гиҗ фермер байрта бәәнә.
Җил болһн малчнр олн зүсн көтлврмүдт орлцҗ, шаңһа демин мөңг авна, эннь кергән делгрүлх эрк биш туста болна. Тер мет Хальмг Таңһчин Толһач Хаска Бату селәнә эдл-ахун көдләчнрин төрмүдт онц оньган тусхаҗ, цуг халхар дөңннә.
– Иргчдән ирлцңгү көтлврт орлцхар зуралҗанав. Үвлд икәр эс киитрхлә, һару угаһар үвлзҗ һархар зуралҗанавидн, гиҗ малч келнә.

КАРСАНА Евгения

Видео