Хальмг теегин хәәртә үрн - Әрәсән Баатр

20-12-2025, 14:58 | Общество, Таңһчин зәңгс, Зіњг

Одахн Әрәсән Президент Владимир Путинлә нег һазра мана дәәч, хаһачнрин батальона 6-ч тойгта ротын командир Очр-Һәрән Нарн шуд залһлдана эв-арһар күүндәд, күцәсн даалһврин тускар зәңглсн билә. Нарн Алексеевичин һардврт бәәсн дәәчнр Донецк Улсин Республикин Северск балһсиг сулдхв. Тер догшн дәәлдәнә йовудт чадмг командирин һардврт мана орн-нутгин цергчнр кергән даавртаһар күцәһәд күслдән күрв.
Бар сарин 17-д болхла Москва балһснд харслтын Министерствд Әрәсән Президент Владимир Путин ах лейтенант Очр-Һәрән Нарнд өрчднь Улан Од зүүлһәд, ирлцңгү бәрмт цаасинь бәрүлҗ өгв.
Эн ончта йовдл нег һазра улсин төлә байр-бахмҗ үүдәв гиҗ темдглх кергтә. Цергә шишлң керг-үүлдврин йовудт залу-зөргәрн ончрсн орн-нутгин Баатрин нер зүүсн Хальмг Таңһчин хәәртә үрн Очр-Һәрән Нарн иим өөдән ачлвр авсн таңһчд хойрдгч күн болҗ һарв. Тодлхд, 2022 җилд Әрәсән Баатрин нер СВО-н йовудт ончрад, әмнәсн хаһцсн Лиҗин Мингиянд зүүлһгдсн билә.
Эн зөргтә хойр дәәч Лагань балһснд өсч-боссн деерән, терүнәс нань хоюрн нег дунд сурһулиг төгсәсн улс болна. Лаганя района бәәрн улсин төлә болхла эн зәңг хойр дам байрта болн темдгтә болв.
– Цергә даалһвран күцәҗәдг тиим зөргтә улс нег һазра улсин төлә эрк биш байр-бахмҗ үүдәнә. Ах лейтенант, Әрәсән Баатр Очр-Һәрән Нарниг әрүн седкләсн йөрәҗәнәвидн, – гиҗ Хальмгин Толһач Хаска Бату темдглв.

ОЛЬДАН Цаһан

Видео