Төрскнч седклин керг-үүлдвр

«Чемданд багтсн музей. Баатрмудын дүрмүд» гисн соньн нер керг-үүлдвр зүүснь өврмҗтә. Төрскән харсачин җилд нерәдсн керг-үүлдврт олн күн орлцв.
Лаганя района толһач Коган Юрий соньн эн харһлтын күндтә гиич болҗ орлцсн эн керг-үүлдврин төрскнч седкл сурһмҗллһна, өвкнрин баатр үүлдвриг мартлго, эндрк үйнрт үлгүр болҗ йовлһнд туслх чинринь темдглв. Сурһуль-эрдмин района профсоюзмуд бүрдәсн музейин чинртә эн керг-үүлдвр төрскнә баатрмудын зөргиг тодлулсн үүлдвр болв. Баатрмудын туск санлыг сергәҗ, баһчудт теднә тускар келҗ өгхәр эн керг-үүлдвр бүрдәгдсмн. Төрскән харсачнрин зургуд, теднә зөргтә үүлдврин туск тоот өрк-бүлднь чемданд, эс гиҗ авдрт дүргдҗ, әрүн кевәр хадһлгдна. Диилврин өдрмүдлә эк-эцкнр тер әрүн тоотан авдрас һарһҗ авад, зургудынь күүкд-көвүдтән үзүләд, дәәнд тедн ямаран кевәр дәәлдснә тускар келҗ өгнә. Өрк-бүлд хадһлгдҗадг дәәч зөргин туск бәрмт цаасн болн баатрмудын зургуд цугтад темдгтә болҗ, өсч йовх үйнрт Төрскнә төлә әмән эс әрвлсн әмтнә зөргиг үзүлҗ, үлгүр авхднь туслх седклтәһәр эн керг-үүлдвр болсмн.
Баатрмудын санлыг тевчҗ, Төрскән харсачнрин нердиг мөңкрүлҗәх эн керг-үүлдврт района багшнр, «Юнармия» болн «Движение Первых» гидг баһчудын бүрдәцсин шунмһа гешүд орлцв.
Төрскән харсачнрин санлыг күндлсн эн керг-үүлдврин йовудт сурһуль-эрдмин болн сойлын халхин көдләчнриг негдүлҗәх, теднә зөв-йосинь харслһнд, күч-көлснә сән таал тогталһна, баһ наста эрдмчнриг дасхҗ, көдлмшт батллһна төрмүд тәвгдсн хамцу үүлдврин бооцанд района толһач Коган Юрий, профсоюзин комитетин һардач Мукөвүнә Татьяна, сурһуль-эрдмин болн сойлын заллтын ахлач Очра Мергн тер бооцанд һаран тәвҗ батлв.
Эн бооцанд темдглгдсәр, багшнрин болн сойлын көдләчнрин күч-көлснә зөвнь харсгдхмн, социальн халхар цуг тоотнь күцәгдхмн. Баһ наста мергҗлтнрт дөң күрггдхмн.
Эн бооцанд һаран тәвҗ батлад, өсч йовх үйнрт сурһуль-сурһмҗ өгчәх, сойлын зөөриг хадһлҗ, цааранднь делгрүлҗәх өдр болһни көдлмшинь үнлҗәх мана һол керг-үүлдвр болҗана, – гиҗ Лаганя района толһач Коган Юрий келв. – Района сурһуль-эрдмин профсоюзин комитет болн сурһуль-эрдмин болн сойлын заллт дигтә сән көдлмш кесинь үнләд, социальн эн хойр халхин иргч үүлдврин туст хамцу даавр авч үүлдҗәхинь темдглҗәнәв. Төрскән харсачин җил төгсч йовна. Болв Төрскән харсачнрин зөргтә үүлдвриг, өвкнрин үлгүрәр Төрскндән церглҗ йовх баатрмудын нердиг мартх зөв угавидн».
Үйнр хоорндк залһлдаг батллһнд, өвкнрин зөөриг хадһлҗ, цааранднь делгрүлҗ йовх, баһчудт төрскнч седклин сурһмҗ өгч йовх көдләчнрт күч-көлснә болн ниигмин кергтә таал тогталһна тускар Лаганя районд иим сән килмҗ һарһгдҗана.
ХӨӨЧИН Галина