Тууврин күчр йовдл бичә үзгдтхә…

Сегодня, 13:16 | Общество, Таңһчин зәңгс, Зіњг

Җил болһн бар сарин 28-д мана таңһчд санлын болн һашудлһна Өдр темдглнә. Цааҗла харһад, арвн һурвн җилдән күүнә һазрт тууврт бәәсн аавнр-ээҗнрин санлыг эн өдр хальмг өрк-бүл болһнд тевчнә. Залу улс Төрскән харсгч Алдр дәәнд ааһ-цусан асхад, залу-зөрмг кевәр дәәлдҗ йовсн цагт гертнь үлдсн медәтнриг, күүкд улсиг болн бичкдүдиг хар гөрәр цааҗла харһулсиг кезәд чигн мартҗ болшго.

Арвн һурвн җилдән төрскн һазрасн салад, Сиврт өлсәд-түрәд, күнд көдлмш кеҗ, мана аавнр-ээҗнр туурмҗта күч-көлсәрн нерән цеврлҗ, бәәрн улс дунд ик күндллһ олсмн. Дәәнд йовсн хальмгудыг цергәс буулһад, Широковск ГЭС-ин тосхлтд йовулснь бас һашута нег йовдл мөн. Тенд мана аавнр хоолцаһан зовлң бас үзәд, хар көдлмш кеһәд, кесгнь әмнәсн хаһцсмн. Әмд үлдснь Сиврин һазрт өөрхн улсан олҗ авад, хөөннь төрскн һазрурн хәрҗ ирсмн. Мана аавнр-ээҗнр Сиврин бәәрн улст ханлтта бәәнә, тегәд чигн «Санлын поезд» гидг керг-үүлдвр бүрдәгдсн цагт эдн тууврт бәәсн һазртан күрәд, баһ цагтан хамдан сурһуль сурч, көдлҗ йовсн үүрмүдтәһән харһсн мөн.
Бар сарин 28-д Элстд «Буйслһн болн Босхмҗ» бумбин өөр санлын хург болна. Район болн селән болһнд өвкнриннь санл тевчҗ медәтнрин төлә харһлтс давна. Дунд сурһульмудт эн һашута өдрт нерәдҗ бас олн керг-үүлдврмүд бүрдәгднә. Н.Пальмовин нертә Келн-улсин музейд хальмг улс тууврт бәәсн җилмүдт нерәдгдсн һәәхүл секгдсмн, терүнд хальмгудыг Сиврүр күчәр нүүлһсн цага өлг-эд, хуучн зургуд үзҗ болхмн.
Мана зәңгч

Видео