Владимир Путинлә һурвн дәкҗ харһв

Сегодня, 14:40 | Общество, Таңһчин зәңгс, Зіњг

Цергә шишлң керг-үүлдврин йовудт Донецк Улсин Республикин Северск балһсиг сулдхлһнд залу-зөрмгән үзүләд, даалһвриг өөдән кемҗәнд күцәһәд Әрәсән Президент Владимир Путинд бәрлдән болсн һазрас тооцаһан өгсн хаһачнрин батальона 6-ч тойгта ротын командир Очр-Һәрән Нарн Әрәсән Баатрин өөдән нер зүүснь мана таңһчин цуг әмтнд ик байр-бахмҗ үүдәв.
Әрәсән Президент җил болһн давулдг «Җилин аш» гидг харһлтд мана нег һазра дәәч орлцад, терүнә йовудт орн-нутгин толһачин сурврмудт хәрү өгснь бас ончта йовдл болснь мөн. Владимир Владимирович харһлтын йовудт Очр-Һәрән Нарнла харһад күүндәд, бәәдл-җирһлиннь тускар соньмссна тускар келәд, зөрмг дәәчин төлә экнь, өрк-бүлнь ик чинр зүүҗәхиг темдглв. Шидр Әрәсән Баатр Очр-Һәрән Нарн ТАСС агентствд интервью өгәд, Әрәсән Президентла болсн харһлтсин тускар ухан-тоолврарн хувалцв.
- Сүл цагт би Әрәсән Федерацин цергә күчнә Деед һардачла һурвн дәкҗ харһв. Энтн ончта йовдл болв. Бидн цергә керг-үүлдврин, тенд тогтсн бәәдлин тускар күүндвидн. Тер мет орн-нутгин толһач мини җирһлин тускар соньмсад, ямаран төрмүд үүмүлҗәхиг, кедү үрн бәәхиг сурв. Цергә күчнә Деед һардачд тооцаһан өгхд ик дааврта болв. Би эврәннь һардврт тиим тооцаһан дару-дарунь өгнәв, тегәд икәр үүмсн угав. Болв дәәллдән болҗадг һазрас ротын командир цергә күчнә Деед һардачд түрүн болҗ тооцаһан өгснь темдгтә болв. Седкүлчнрлә болсн харһлтд би бәәтхә, иим керг-үүлдврмүдт орлцдг дамшлтта седкүлчнр зөвәр үүмәд бәәв. Мини элгн-садн намаг үзәд, өврв – амрлһнд ирхш, телеүзләр болв чигн чирә-зүснь хәләхм гиҗ хөөннь хувалцв. Күүкдм намаг үзәд эцкәрн бахтв, – гиҗ Очр-Һәрән Нарн күүндврт келв.
Седкүлчнр Нарн Алексеевичиг бийиннь тускар, цергә керг-үүлдврт орлцҗахиннь тускар келҗ өгхиг сурв. Әрәсәд мобилизац зарлгдсна хөөн эн эврә сән дурар цергә керг-үүлдврт орлцхар шиидсмн. Цергә хаалһан эн ДНР-ин Соледар балһснд эклсмн. Ода энүнә һардврт зун һар күн бәәнә. Очр-Һәрән Нарн хамдан дәәлдҗ йовх цергчнрин тускар бүләнәр келҗ, эдн өмн тәвсн даалһвриг өөдән кевәр күцәҗ, арһ-чидлән негдүләд, ниитәһәр дәәлдҗ йовхиг темдглв. Шин җилин өмн өргнд бидн мана зөрмг баатрин чирәд цуг мана дәәчнрт эрүл-менд, бүрн бүтн хәрҗ ирхиг дурдҗанавидн.
ДООҖАН Наталья

Видео