«Улсин нүүдлиг» хамдан хәләв

Намрин түрүн сарин чилгчәр Хальмг Таңһчд шар шаҗна нарт-делкән ик хург давв. Эннь һарчадг җилин хамгин ончта, тууҗлгч чинртә йовдл болснь лавта. Һаха сарин 25-д байрин бәәдлд өргмҗтәһәр эн керг-үүлдвр секгдсмн. Шидр «Сойл» шаңһа телеүзлин соңсхврт эн йовдл үзүлгдснь бахмҗта болв.

Бембә өдрлә Элстин «Октябрь» кинотеатрт Хальмг Таңһчин һардврин, Улсин Хуралын (Парламентин), залврин, министерствсин, ведомствсин, Элст балһсна Хургин, зөв-йос харлһна болн баһчудын бүрдәцсин элчнр, райодын толһачнр, волонтермуд болн артистнр цуглрад, шар шаҗна нарт-делкән ик хургин секлһнд нерәдсн соңсхвриг хамдан хәләв.
Тодлхд, Элстин шатрин балһсна ца бәәдг «Нүүдл күүнә бәәрнә» ормд углҗ тәвгдсн ик тәәз деер «Улсин нүүдл» нертә ик наадн үзүлгдв. Келхәс, энүг орн-нутгин нертә продюсер болн режиссер Андрей Болтенко күцәв. Эң-зах уга өргн теегт шар шаҗн яһҗ делгрснь кесг домгудар болн тууляр дамҗад, нүүдл улсин тууҗла олн-әмтиг таньлдулв. Тиим ке-сәәхн, өргн байриг нег һазра мана улс урднь үзәд уга бәәсмн. Тәәз деер өндртән арвн метр өдгә цагин некврлә ирлцҗәдг шишлң LED-экранд олн зүсн өңгтә сәәхн зургуд сольгдад бәәв. Москва балһснд көдлҗәдг нер һарсн, нег һазра режиссер болн артист Саңһҗин Евгений цуг наадна йовудт нүүдл улсин домгудыг келҗ өгв. Хальмг Таңһчин сойлын үүдәгч коллективсин артистнр нааднд орлцад, дуучнр болн биичнр болхла нег-негән соляд сәәхн бииһән бииләд, еңсг дууһан олнд соңсулсн билә.
«Улсин нүүдл» наадыг хәләснә хөөн Хальмг Таңһчин Толһач Хаска Бату үг авч, энүнә тускар тодрхаһар цәәлһҗ, ухан-тоолврарн хувалцв.
– Тер өдрин өрүнә теңгрин бәәдл мадниг байрлулад, нарн мандлҗала. Асхар генткн салькн көдләд, һаза зөвәр серүн болв. Наадна режиссер Андрей Болтенко нанд җиңнүләд, салькн улм көдләд, белдсн наадыг үзүлҗ болшго гиҗ нанд келв. Тиигхд, би таңһчин МЧС-ин заллтын һардач Мальтинә Мергнлә залһлда бәрәд, салькн зогсхинь медүв. Дарунь наадна режиссерт зәңгләд, олн-әмтн тууҗлгч йовдлыг үзснь тер.
Эн наадыг белдлһнә кемд Андрей Болтенкола хамдан Элстин кесг ормиг хәләсн биләвидн. Түрүләд олн-әмтн багтамҗта бәәрнд давулхар зуралҗалавидн. Зуг режиссерин хәләцәр һаза углҗ тәвгдсн ик тәәз кергтә болв. Кесгтән күүндәд, ирлцңгү ормд наадан үзүлхәр шиидвидн, – гиҗ Бату Сергеевич олнд цәәлһҗ келв.
Тер мет Хаска Бату шар шаҗна нарт-делкән хург давуллһнд орлцсн цуг улст ик ханлтан өргв. Дөрвн өдртән болсн ик хургин йовудт мана таңһчд 35 орн-нутгас долан миңһн һар гиич ирәд, тәвн һар керг-үүлдврт орлцсн болдг. «Улсин нүүдл» наадн олн гиичнрин төлә өврмҗтә болв, энүнә тускар эдн эндр чигн келәд бәәцхәнә.
Харһлтын чилгчәр Бату Сергеевич шар шаҗна хургин ашинь дигләд, чинртә нааднд орлцсн улст Ханлтын бичгүд бәрүлҗ өгв. Драмин болн шог наадна Орс театрин эрдм-билгин һардач Сарңга Алексей, Хальмгин ачта артистк Орһан Эрвена, Басңга Баатрин нертә Келн-улсин театрин артистк Манҗин Байр, «Теегин дәәч» буйнч саңгин һардач Абдула Заяна (зургт) ачлгдв.
«Октябрь» кинотеатрт болсн харһлтд нег һазра мана спортсмен, Әрәсән багин ханьд орсн футболист Бевин Мингиян орлцснь темдгтә болв. Энүнә келсәр, шар шаҗна нарт-делкән хург давҗасн цагт цол уга болад, гертән ирҗ чадсн уга, ода болхла энүг шаңһа телеүзлд үзәд икәр байрлсан медүлв.
Эн харһлтд Хаска Бату җилин ончта йовдлмудын тускар бас келв. Нег үлү шидр Әрәсән Баатрин нер зүүсн Очр-Һәрән Нарна тускар олнд тодлулв. – Мел тиим зөргтә улсас бидн үлгүр авх зөвтәвидн. Тер мет аавнр-ээҗнрмдн дәәнә болн тууврин зовлңгиг дааҗ һарад, таңһчан шинәс босхад, төрскн һазран маднд герәслҗ үлдәв гив.
Харһлтыг ашлад, таңһчин Толһач өөрдҗәдг Шин җилин байрла йөрәһәд, нег һазра улстан цаһан хаалһ дурдв.
КАРСАНА Евгения