Шин җилд түрүлҗ көвүн һарв

13-01-2026, 11:33 | Общество, Таңһчин зәңгс, Зіњг

Сән авъяст тохрсар бидн шин җилд кедү нилх һарсна тускар бичнәвидн. Тегәд 2026 җилин туула сарин 1-д үдин хөөн О.Шунгаеван нертә нилхд төрлһнә Төвд Сатаевихнә өрк-бүлд көвүн һарв. Элст балһснд бәәдг баахн Нурия Сатаева түрүн болҗ цаһан төр болв. Нилхд төрлһнә Төвин эмч Манцан Галина болн акушерк Танан Алена күүкд күүнд цаһан төр болхд дөңгән күргв. Тер өдрин бийд Нимгрә Людмила бас цаһан төр болад, көвү һарһв. Эднә өрк-бүлд күүкн бәәнә, тегәд эдн хойр үртә болв.
Хальмг Таңһчин эрүл-менд харлһна министр Саран Булат баахн экнриг байрта йовдлла йөрәһәд, бат эрүл-менд дурдв. Министрин темдглсәр, һарсн нилх болһнд Хальмг Таңһчин Толһачин белг бәрүлҗ өггднә. Терүнд нилхд кергтә хувцн, олн зүсн эд-тавр бәәнә. Нилхд төрлһнә Төвин һардвр шин җилд түрүлҗ һарсн бичкдүдт эмнлһнә бүрдәцин нерн деерәс бас белг бәрүлҗ өгдг авъяс бәәнә. Төвин көдләчнр туула сарин 1-д һарсн нилхдин экнриг йөрәһәд, кинь акч, көлнь шоратҗ сән үрд болҗ өсхиг дурдв.
Мана таңһчд нилхд төрлһиг урмдуллһна, баахн өрк-бүлмүдиг дөңнлһнә керг-үүлдврмүд күцәгднә. Тиигәд, 2023 җиләс авн һарсн нилх болһнд Хальмг Таңһчин Толһачин белг бәрүлҗ өггднә. Давсн җилин чилгчәр Хальмг Таңһчин Толһач Хаска Бату эн белгиг 2030 җил күртл бәрүлҗ өгхин туск зәрлг батлв. Тер мет таңһчин Толһачин зәрлгәс иштә 25 нас күрәд уга баахн күүкд улст түрүн үрнь һарсн цагт нег дәкҗ өгдг демин мөңгнә кемҗән 30 миңһнәс авн 100 миңһн арслң күртл икдүлгдв. Нидн О.Шунгаеван нертә нилхд төрлһнә Төвин улнь батруллһнд 131 сай арслң йилһгдв. Шаңһа мөңгн өдгә цага кергсл хулдҗ авлһнд олзлгдв, терүнәс иштә саата күүкд улст болн нилхдт эмнлһнә халхар күрглһнә чинрнь бас кесг холванд өсв.
БАТАН Наталья

Видео