Бурхна әрүн тоотыг үзәд

Хальмг Таңһчд бурхн-шаҗна үүлдәчнрин нарт-делкән һурвдгч хург болсн йовдл таңһчин әмтнд мартгдшго нег йовдлнь болв.

Кесг зууһад җилмүдин туршарт хальмгуд Бурхн Багшин номд шүтҗ, энүнә заасн номин хаалһар йовҗ, җирһлиннь ул-сүүр кесмн. Өвкнрәс эк-эцкнрт, дарунь үрдтнь шаҗна эн ном күртҗ, җирһлднь герл өгч йовна. Шаҗна номиг цәәлһҗ медүлҗ йовсн гелңгүд әмтн дунд күндтә бәәсмн. Ик цолта багшнр, нер зүүсн шаҗна үүлдәчнрин тускар соңсч, теднд зальврхас биш эгл улс тедниг үздго бәәсмн. Ик цолта ламла, нег үлү Дала Ламин Гегәнлә харһна гисн икл хөвтә йовдл бәәсмн. Тер учрар Дала Ламд күрәд, төвдин һазрт алтн деевртнь күрч мөргүлднь орсн хөвтә улсин тускар күндлҗ келдг бәәсмн.
Тегәд XIV-ч Дала Ламин Гегән Хальмг Таңһчд дөрвн дәкҗ залрҗ ирсн йовдл басл ик хәәртә үүлдвр болсмн.
Давсн җилд зүүднд оршго ик хөвтә йовдл мана үйин улст учрв. Бурхн Багшин әрүн тоот Элстд Энткгәс авч ирҗ үзүлгдснь тиим седкл үүмүлгч чинртә болв. Кесг зовлң үзҗ, цааҗллһнла харһҗ, өлсәд-түрҗ йовсн бийнь хальмгуд бурхан зүркндән хадһлад, үрдтән бурхна номин цәәлһвр өгәд, күүнд му келго, чик седкләр бәәснәс үнтә юмн угаг мана ах үйин улс маднд дасхсмн. Бурхндан иткҗ бәәлһнә үлгүр үзүлҗ йовсмн. Цааҗллһна зовлңгиг дааҗ һарсн, дәәнд әмән әрвллго Төрскән харссн, Диилвр делдхин төлә унтл-кевтл уга көдлҗ йовсн ах үйин улсин ач-тус тиигәд эндрк үйнрт туслҗ йовна гиҗ Бурхн Багшин әрүн тоотд зальврхларн би санув. Үнн юмн үнндән һарх гисн теднә иткл җирһлин күчн бәәсмн. Бурхндан итклһнә күчн кесг үйин улсиг негдүлҗ, залһҗ, әмдрлднь түшг болҗана.
Долан хонгин туршарт миңһәд күн Бурхн Багшин Алтн сүмд ирҗ, бурхна әрүн тоотд зальврҗав. Мана хурлыг Бурхн Багшин Алтн сүм гиҗ нерәдснь бас хара йовдл биш бәәҗ. Цагнь ирәд, Бурхн Багшин әрүн тоот нааран ирҗ, миңһәд улст оюни герл асах гиҗ Деедс Бурхд медсн бәәдлтә. «Ом мани падме хум» Бурхн Багшин әрүн хәәрнд күртх хөв-кишг үүлдвриг күцәсн Әрәсән, Хальмг Таңһчин, Энткгин йосна болн шаҗна үүлдәчнрт хальмгуд цугтан ханлтан медүлҗәнәвидн.
Зүүднд оршго йовдл учрснь басл ик хөв болҗана.
«Ом-мани-падме-хум!»
Баруна Байн Җирһл