Хальмгин хәәртә үрнә нернь мартгдшго

Сегодня, 11:43 | Общество, Таңһчин зәңгс, Зіњг

Туула сарин 8-д Әрәсән Баатр Лиҗин Мингиян 35 насан зүүхмн билә. Тер өдр Лагань балһснд санлын митинг болв. Лаганя района болн Лагань балһсна һардвр, цергә йовдлмудт орлцачнр-ветеранмуд, зөв-йос харлһна бүрдәцсин элчнр, баһчуд болн бәәрн улс санлын керг-үүлдврт орлцв.
Тодлхд, Лиҗин Мингиян Лагань балһснд өсч-босад, дунд сурһулян төгсәһәд, В.Ф.Маргеловин нертә Рязань балһсна нисәчнрин ик сурһульд сурв. 2022 җилд цергә шишлң керг-үүлдвр эклхд, түрүн өдрәснь авн терүнд орлцв. Тер җилин ноха сард догшн дәәлдәнә йовудт күндәр шавтад, әмнәсн хаһцсн болдг. Хулһн сард болхла орн-нутгин Президент Владимир Путинә зәрлгәр Лиҗин Мингиянд Әрәсән Баатрин өөдән нерн зүүлһгдв.
Лаганя района муниципальн бүрдәцин толһач Коган Юрийин темдглсәр, Лиҗин Мингиян бәәрн улсин төлә бәәтхә цуг таңһчиннь болн орн-нутгин улсин төлә үлгүр болҗана. Энүнә туурмҗин тускар дорас өсч йовдг баһчуд медәд, иргчдән үйәс үйд келҗ санлынь хадһлад йовх гив.
Җил хооран Лагань балһснд таңһчин хәәртә үрнә санлынь мөңкрүләд, Лиҗин Мингияна бумблв босхгдсн билә. Һарснь өдрләнь нааран олн-әмтн ирәд, гүрмр цецгүд тәвәд, санлынь тевчв.

ОЛЬДАН Цаһан

Видео