Әрәсән Баатрла болсн харһлтс

Сегодня, 11:45 | Общество, Таңһчин зәңгс, Зіњг

2025 җилин бар сарин 30-д Хальмг Таңһчин Толһач Хаска Бату Әрәсән Баатр Очр-Һәрән Нарнла харһад күүндв. Терүнә йовудт Бату Сергеевич орн-нутгин өөдән нер зүүснләнь йөрәһәд, Нарн Алексеевич нег һазра улсин төлә байр-бахмҗ болҗахинь онц темдглв.
Ах лейтенант Очр-Һәрән Нарн өрк-бүлиннь, эврәннь цергә тууҗин болн хамдан дәәлдҗ йовдг үүрмүдиннь тускар келҗ өгв. Тер мет нег һазра улс цергә шишлң керг-үүлдврт орлцачнриг даңгин дөңнҗәхиг темдгләд, ик ханлтан өргв.
– Амр биш цагт цергә даалһвран күцәҗәдг мана орн-нутгин олн келн-улсин элчнр хоорндан ахнр-дүүнр мет олна кергин төлә әмән әрвллго дәәлдҗәнә. Дорас өсч йовдг баһчудын төлә тедн цуһар үлгүр болҗ йовна. Хальмг Таңһчин олн-әмтнә төлә болхла Әрәсән Баатр Очр-Һәрән Нарн зөргтә дәәч, чадмг командир, төрскн һазртан хару күн болҗана. Мел тиим улс иргчдән төрскн һазриннь делгрлтд болн цецгәрлтд туслҗ чадхмн, – гиҗ Хаска Бату темдглсн болдг.
Терүнә дару Нарн Алексеевич таңһчин седкүлчнрин сурврмудт хәрү өгв. Зөргтә дәәч цергә шишлң керг-үүлдвр давҗадг һазрт ямр күнд-күчр тоот учрдгинь, үүрмүдән даңгин дөңнәд, ицлән геелго даалһвран яһҗ күцәхиг келв.
– Орн-нутгин Президент Владимир Путин Әрәсән Баатрин нер зүүснь ик чинртә болн йир дааврта керг болна. Дәәлдән болҗадг һазрт хамгин әәмшгтә болн күнд кемд Төрскән болн өөрхн улсан санхла, эннь нанд урмд өгнә. Юмнас әәлго мел өмәрән зүткх кергтә, гиҗ саннав – гиҗ Очр-Һәрән Нарн тоолврарн хувалцв.
Терүнәс нань Нарн Алексеевич нег соньн тууҗин тускар бас келҗ өгв. Энүнлә хамдан церглҗәдг дәәч урднь Әрәсән Баатр Лиҗин Мингияна һардврт бәәсн нисәчнрин 83 багин ханьд орҗасмн. Одахн Очр-Һәрән Нарн Әрәсән Баатрин нер зүүсинь соңсад, энүнд җиңнүлсн бәәҗ. Тер дәәч Нарн Алексеевичиг йөрәһәд, хөөннь иигҗ келв: «Хойр хальмг командириг меднәв, эдн хоюрн Әрәсән Баатрин нер зүүнә. Дәкәд хальмг командир ирхлә, эрк биш һурвдгч Баатр болхмн», гиҗ эн келҗ.
Тер өдр Очр-Һәрән Нарн Б.Б.Городовиковин нертә баһчудын Герт баһчудла бас харһв. Тогтсн авъясар, күндтә гиичиг улан зандн цәәһәр болн боорцгар тосад, цаһан хадг татв.
Хамгин түрүнд Әрәсән Баатр Б.Б.Городовиковд нерәдсн музейд орад, тенд хадһлгдҗадг тоотла таньлдв. Тер мет СВО-н ветеранмуд Очр-Аран Эрдньлә болн Ханан Дольганла болсн харһлтд онц оньг өггдв. Дольган Юрьевич «Баатрмуд-08» көтлврт орлцач болн таңһчин баһчудын Төвин һардачин дарук болна. Эрднь Владимирович болхла робототехникин эв-арһиг баһчудт зааҗ дасхна.
Баһчудын бүрдәцсин элчнр Әрәсән Баатрла харһад, кесгтән күүндәд, соньмсулҗадг сурврмудан өгв. Очр-Һәрән Нарн бичкндк цаган тодлад, дунд сурһульд спортар соньмссан келв. Энүнә темдглсәр, хамгин түрүнд эк-эцкән болн ахнран күндлх кергтә, тиим авъясар бәәхлә ямр чигн керг бүтәд, тәвсн күслдән күрч болна, гиҗ Нарн Алексеевич сурһмҗ өгв.
Терүнәс нань Очр-Һәрән Нарн цергә тууҗиннь тускар баһчудт бас келв. Әрәсән Баатрин нер зүүснә хөөн кех-күцәх кергнь улм дааврта болсинь эн темдглв.
Зөргтә дәәч болн чадмг командир болсн деерән Нарн Алексеевич олн үртә эцк болна. Эцктәһән хамдан ууһн үрнь Виктория харһлтд бас орлцв. – Бидн, ах-дү дөрвүлн эцкдән йир дуртавидн. Мадна төлә эн эрк биш үлгүр болна. Өдгә цагт цергә даалһвран күцәҗ йовна, бидн болхла өдр болһн зальврад, эцкмдн хамдан дәәлдҗ йовдг үүрмүдтәһән диилвр делдҗ, гертән әмд-менд ирхиг күләҗәнәвидн. Мана эцк даңгин өмәрән зүткҗ йовна, бидн болхла арднь дахад, ямр чигн кергт энүг дөңнәд бәәнәвидн, гиҗ Виктория келв.
Харһлтыг давулсн «Движение Первых» җисәнә хүүвин ахлач Дарбака Вангьял Әрәсән Баатрла күүндснә дару ухан-тоолврарн хувалцв. Энүнә темдглсәр, цецн ухата, зөргтә дәәч Очр-Һәрән Нарнла харһсндан байрта бәәнәв. Баһчудын төлә иим күүнлә болсн харһлт эрк биш чинртә болн туста болна. Энүнә туурмҗин болн дамшлтын тускар бүрдәгдсн күүндвр темдгтә йовдл болснь лавта, гиҗ Вангьял келв.
Харһлтын чилгчәр Әрәсән Баатр Очр-Һәрән Нарн «Движение Первых» җисәнә сурһмҗлгчнрин тоод орулгдад, шишлң темдг өрчднь зүүлһгдв.
КАРСАНА Евгения

Видео