Цергчнрин өрк-бүлмүд Непалд одв

15-01-2026, 14:21 | Общество, Таңһчин зәңгс, Зіњг

Гималайд күрнә гисн күсл кенд чигн зүүдн орснла әдл болна. Хальмг Таңһчин Толһач Хаска Батун дөңгәр СВО-н цергчнрин өрк-бүлмүд шин җилин амрлһна цагла Гималайд күрч чадв.

Бату Сергеевичин седвәрәр цергчнрин һурвн өрк-бүлд тиим хөвтә йовдл учрв. Таңһчин Толһачин дөңгәр һурвн өрк-бүл йиртмҗин өвәрц таалта Гималайд күрснә тускар «Төрскән харсачин» әңгин барин цергллт зәңглв.
Бурхн Багшин номд шүтдг хальмгудт эн һазр йириндән хәәртә болдмн. Шаҗна үүлдәчнрин нарт-делкән һурвдгч цуглранд нерәдәд, мана газет Непалын бурхн-шаҗнла залһлдата ормсин тускар бичсмн. Ода Хальмгин һурвн өрк-бүл тер евәлтә һазрт күрснь йир соньн гих кергтә.
Бурхн Багшин ном делгрлт авсн һазрт күрлһн ухан-седклд тодлгдсн соньн йовдл болв. Хальмгин өрк-бүлмүд зуульчнрин делегацин ханьд бурхн-шаҗна кесг әрүн һазрт күрч мөргҗ зальврв. Әрәсән Федерацин элччлт эн туст ик дөңгән күргв.
«Маднд эн йовлһн икәр таасгдв. Ода күртл үзсн тоот уханд орад бәәнә. Нутгин ке-сәәхн тоотла таньлдсн деерән бидн тер һазрин әмтнә килмҗд бәәснь мартгдхш. Бурхн-шаҗнла залһлдата ормсар йовад, үнн седкләсн зальврсан мартҗ болхий? Иим сән йовлһ бүрдәсн Хальмг Таңһчин Толһачд, «Төрскән харсачнр» саңд, нань чигн улст үнн седклин ханлтан медүлҗәнәвидн», – гиҗ эн өрк-бүлмүдин нерн деерәс ханлтын седклән Ирина Беликова медүлв. Адьян Нимеевин тоолврар, өвәрц сәәхн һазрт одсн йовдл ик чинртә болв. Зуульчллһиг сойлла залһлдулсн, шаҗна әрүн һазрт күрсн йовдл күүнә җирһлд учрсн ик хөв болҗана. «Хальмг Таңһчин Толһач Хаска Батун седвәрәр бүрдәгдсн эн йовлһнд Непалд үүлддг Әрәсән элчллт дөң күргснь эннь улсин хоорндк залһлданд ик иргчтә бәәдл тогтаҗахинь медүлҗәнә. Эн йовлһн мини цаарандк көдлмшт ик урмдта болв», – гиҗ СВО-н ветеран Георгий Анджаев эврәннь тоолвран медүлв.

ҖИРҺЛИН Кермн

Видео