Барин ветеран дамшлтарн хувалцв

Сегодня, 14:55 | Общество, Таңһчин зәңгс, Зіњг

Туула сарин 13-д Әрәсән барин көдләчнр сән Өдрән темдглв. Хол 1703 җилд мел эн өдрлә «Ведомости» нертә орн-нутгин түрүн газет барас һарсмн. Энүнәс иштә эн сән Өдр болҗ батлгдв. Газетин редакцсин седкүлчнр болн Интернетин эв-арһар дамҗад, олн бүрдәцсин көдлмшин тускар зәңглдг көдләчнр эн байриг темдглнә.
Шидр «Калмыкия» таңһчин зәңгллһнә Агентствд сән өдрт нерәдсн байрин хург болв. Хальмгин залврин ахлачин дарук – то-дигин делгрлтин министр Этән Алексей таңһчин седкүлчнриг йөрәв.
– Өдр болһн мана таңһчд, орн-нутгт, цуг делкәд учрсн йовдлмудын тускар тодрхаһар зәңглҗ йовнат. Хамгин түрүнд барин ветеранмудт ик ханлтан өргҗәнәв, тана үлгүрәр эндр көдлҗәдг седкүлчнр кергитн цааранднь даавртаһар күцәҗ йовна. Өдгә цагт Интернетин шин эв-арһс делгрәд йовна, зуг олн-әмтн нег үлү ах үйин улс урдк кевәрн зәңгиг газетин халхст умшхар седнә, – гиҗ Алексей Петрович темдглв.
Керг-үүлдврин йовудт тогтсн авъясар ончрсн барин көдләчнр ачлгдв. Тер мет Этән Алексей һарсн җилин намрар Элстд болсн шар шаҗна нарт-делкән ик хургин йовудын тускар олнд зәңглсн седкүлчнрт Хальмг Таңһчин Толһачин Ханлтын бичгүд бәрүлҗ өгв.
Дарунь «Калмыкия» РИА-н һардач Марила Хоңһр үг авч, хамдан көдлҗәдг үүрмүдән бас йөрәв. Хоңһр Анатольевич 2025 җилин көдлмшин ашинь диглҗ, орсн җилд кех-күцәх тоотын тускар зәңглв.
Тер өдр барин Герт урднь арвн тавн җилдән «Хальмг үнн» газетин ах редакторар көдлсн Хальмгин күндтә иргн, таңһчин сойлын ачта көдләч Альдан Александрла соньн харһлт болв. Александр Бурхаевич 1983 җиләс авн 1998 җил күртл редакцд мана газетин редакциг чадмгар һардҗ йовла. Өдгә цагт энүнә һардврт көдлсн седкүлчнрин кесгнь эндр күртл редакцд көдлҗәнә. Ах үүрән тосад, хамдан көдлсн цаган тодлад, баахн седкүлчнрт эврәннь байн дамшлтын тускар эдн келцхәв. Альдан Александр «Хальмг үнниг» амр биш цагт һардсмн, тер юңгад гихлә йирдгч җилмүдт мана орн-нутгт оңдаруллһн учрсмн, әмтн кесг сардан җалван авлго көдлҗәсән чигн мартад уга. Тер бийнь нег чигн көдләч көдлмшәсн һарсн уга, цуһар седклән тәвҗ, даалһсн көдлмшиг цаг-болзгтнь күцәдг бәәсмн. Өдр болһн Москваһас ЦК КПСС-ин илдклмүд ирдг билә. Энүг тер дарунь гилтә хальмг келнд орчулх неквр тәвгдҗәсмн. Зәрмдән эн көдлмшиг ора күртл кедг бәәҗ. Терүнәс нань харһлтын йовудт күндтә гиич шогта-инәдтә йовдлмудыг бас тодлв. Күүндврин йовудт Александр Бурхаевич бичгдлһнә кемд ямр эв-арһсиг олзлсан зааҗ келв.
Эндр көдлҗәдг баһчуд барин ветеранд сурврмудан өгч чадв. Хамгин түрүнд барин көдләч көдлмшән даавртаһар болн олн-әмтнд медгддгәр бичх кергтә гиҗ темдглв. Көдлмшән эрк биш седклән тәвҗ күцәх кергтә, гиҗ эн сүв-селвгән өгв.
КАРСАНА Евгения

Видео