Бичкдүдт белгән нерәдв

Сегодня, 15:15 | Общество, Таңһчин зәңгс, Зіњг

Әрәсән Президент Владимир Путинә седвәрәр 2018 җиләс авн давулгдҗадг «Күслин һацур» гидг керг-үүлдврин йовудт шаңһа йосна, зака үүдәгч бүрдәцсин элчнр, арһлачнр болн йирин улс бичкдүдин әрүн сана күцәҗ байр белглнә. Әрәсән Федерацин Хүүвин гешүн Хачира Борис җил болһн терүнд орлцҗ, нег һазра күүкд-көвүдиг Шин җилин байрла йөрәҗ, теднд белг бәрүлҗ өгнә. Эн җил чигн Борис Бекмуратович эн буйнч седклин кергт орлцад, бичкдүдлә харһв.
Элст балһснд бәәдг Арслан көвүн спортд дурта, тегәд эн футбольн үүдин тускар ухалсмн. Хачира Борис «Күслин һацур» гидг керг-үүлдврин йовудт көвүнә сана күцәхәр шиидв. Одахн эн Арслана өрк-бүллә харһв. Көвүнә экин келсәр, хойр көвүнь футбол наадхдан дурта, тегәд эдн хаврар герин һаза сән таал тогтахар зуралҗана. Көвүд футбольн үүдд белглснд теңкән уга байрлв. Хавртан терүг углҗ тәвәд, көвүд үүрмүдтәһән хамдан футбол нааддг болхмн.
Харһлтд уйн наста шатрч Эльзята Левгеева орлцснь темдгтә болв. Арслан бас шатр наадхдан дурта, тегәд эдн хамдан цаган соньн кевәр давулҗ, эн наадын тускар күүндв. Эльзята орн-нутгин бәәтхә, нарт-делкән марһаст диилвр бәрҗ нер һарна, тегәд күүкн ямаран дөрлдәнд орлцснаннь, терүнд белдвр кедгин тускар хувалцснь көвүдт соньн болв. Борис Бекмуратович бийнь шатр наадхдан дурта, тегәд Эльзятд Москва балһснд ирх үрвр кеҗ, нертә шатрч Сергей Карякинла харһлтд бүрдәх болв. «Нертә шатрчла болх харһлт күүкнд ик урмд өгч, күцәмҗтәһәр марһаст орлцҗ диилвр бәрхд эрк биш туслх. Герензел Халгаевна экнь күүкнәннь билг делгрүллһнд ик тәвцән орулҗахд, чик сурһмҗ өгчәх төләднь ханлтан өргв», - гиҗ Хачира Борис келв.
«Күслин һацур» гидг керг-үүлдвр лу сарин чилгч күртл болхмн. Шаңһа туслмҗин эв-арһар Елкажеланий.рф сайтд орад, күн болһн эн керг-үүлдврт орлцад, бичкдүдин сана күцәҗ чадҗана.
ДООҖАН Наталья
ЗУРГТ Әрәсән Федерацин Хүүвин гешүн Хачира Борис бичкдүдлә харһсн кем

Видео