Цаһан Сард нерәдәд

Шин җил зөвтән орад, байрин болн амрлһна өдрмүд давад, җирһлин йовуд йирин хаалһдан орв. Бурхн Багшин Алтн сүмд оюни үүлдвр цаарандан делгрҗәнә. Хальмг Таңһчин нерн деерәс бәрц бәрлһнә шаҗна әрүн тоот энд белдгдҗәнә. Энткгин һазрас ирсн гелң шаҗна шишлң тер үүлдвриг Цаһан Сарин байриг угтҗ күцәҗәнә.
Эн җил хальмгудын байр лу сарин 18-д болхмн. Хальмгин Шаҗн Лам гевш Тензин Чойдакин үрврәр Энткгин гевш лхарамб Чой Гьяцо ирсмн. Шаҗна ик чинртә йосрхл күцәгдсн цагт олзлдг шишлң кергтә тоотыг гүн медрлттә болн ик дамшлтта, ик цолта гелң белдҗәнә. Бурхн Багшин Алтн сүмд гевш Чой Гьяцо шар тоснас болн нань чигн тоот ордг хольврас нәрн бүрдәцс диглҗ, шаҗна йосрхлд туста болдгар нәәһинь олҗ күцәҗәнә. Белн болсн цагтан шаҗна тер әрүн тоот хурлын мөргүлин хорад залҗ тәвгдхмн.
Гевшин эвтә һарар йир нәрн болн оюни чинртә тоот тер олн зургудтнь орҗана. Манла Бурхна дүр, бадм цецгин олн зүсн бәәдл өңг-зүсәрн йилһрҗ, тер өвәрц зургуд - тормад орна. Эннь ямаран нәрн үүлдвр болҗахинь хурлд ирҗәдг әмтн медҗ авв. Шаҗна хамгин әрүн темдгүдлә өөрхн таньлдҗ, терүнә чинринь медҗ, зальврх таал тиигҗ учрҗана. Нәрн иим тоотыг күцәлһнд бүкл сара хонг кергтә болна. Хальмгин әмтн Цаһан Сарин байрла гевш Чой Гьяцон күцәсн шаҗна өвәрц чинртә тер тоотла таньлдҗ, терүнә евәлд багтх таал учрхмн.

УШКАНА Сувсн