Дала Ламин төв тосхчана

Бурхн Багшин номд шүтдг әмтн олар оддг һазрт Бодхагайяд ик чинртә Төвин тосхлт шунмһа кевәр күцәгдҗәнә. Төвдин болн Энткгин кезәңк ухани зөөриг хадһлҗ, олн-әмтнд медүлх күслтәһәр эн тосхлт кегдҗәнә. Эн Төв Дала Ламин нер зүүхмн.
2023 җилин туула сарин 3-д эн Төвиг Дала Ламин Гегән бүрдәсн билә. Төвдин болн Энткгин кезәңк цецн гүн номиг өдгә цагла ирлцүлҗ олзллһна күслтәһәр тер бүрдәгдсмн. Энд номин олн-зүсн халхсар шинҗллтс кегдҗ, номин үүлдвр күцәлһнә төлә цуг тоот бәәхмн.
Номтнр энд харһҗ номин төрмүдәр зүтклдҗ, тохнята болн тоолврта күүндврмүд кеҗ, кезәңк цецн ухатнрин медрлиг өдгә цагин йовудт ямаран кевәр цәәлһҗ, медүлҗ болх арһинь хәәх зөвтә гисн тоолвртаһар эннь бүрдәгдсмн. Тасрхан уга шинрүлгдәд, сольгдад йовдг делкәд өр-өвч седклин, эвин бәәдлин, шагшавдын ухани седкл зүүлһдг тоотыг олнд медүлҗ чадх күсл тәвгдсн бәәнә.
Уралан зөрсн зөргтә эн төсвиг эклҗ күцәлһнә түрүн ишкдлнь давсн җилин мөрн сарин 3-д кегдсн билә. Тиигхд Төв Энткгин цуг номтнриг болн шаҗна үүлдәчнриг цуглулсн хург бүрдәсн билә. Төвдин болн Энткгин кезәңк гүн номин цецн авъясмудыг хадһлҗ, тедниг цагин йовуд дахулҗ, олнд медүллһнә төр тиигхд түрүн болҗ тәвсн мөн. Шаҗна номин халхар үүлдҗәдг номтнр болн шаҗна хувргуд дамшлтын тускар күүндҗ, кезәңк номиг өдгә цага бәәдлд ямр кевәр олзлҗ болхин туст ухан-тоолврарн хувалцв.
Хургт орлцачнрт нерәдсн үгдән Дала Ламин Гегән иим Төв бүрдәгдҗәх йовдл энүг икәр байрлулҗахиг медүлв. «Энткгин һазрас Төвдүр ирсн Бурхн Багшин шаҗн болн гүн ном төвдин ухани зөөриг байҗулҗ, улм ик делгрлт авсмн, - гиҗ Дала Ламин Гегән темдглв. Төвдин әмтн 1300 җилин туршарт кезәңк Энткгин ухани зөөриг әрүнәр хадһлҗ йовсмн».