Москван мүҗд лаганя баатрин санлынь мөңкрүлв

Сегодня, 11:44 | Общество, Таңһчин зәңгс, Зіњг

Нидн бар сарин эклцәр Төрскнә Баатрмудын Өдр угтҗ Москван мүҗин Химки балһсна 10-ч тойгта лицейд Хальмг Таңһчин Лаганя района Северное селәнд өсч-боссн Түрвән Чиңһст нерәдсн «Баатрин парт» гидг керг- үүлдвр давулгдснь бахмҗта болв. Минь эн сурһулин бүрдәцд Чиңһс Николаевичин Настя болн Ксюша хойр күүкнь сурчадг болна.Эднә эцкнь цергә шишлң керг- үүлдврт орлцад, догшн дәәлдәнд баатр йовдл үзүләд, цергә үүрмүдән харсч йовад,әмнәсн хаһцсн мөн.

1993 җиләс авн 2003 җил күртл эн Лиҗ-Һәрән Түрвән нертә Лаганя района Северное селәнә дунд сурһульд сурсн болдг. Дарунь Хахлына Тамаран нертә медицинск колледжд орад, сурһулян төгсәснә дару Чиңһсиг залһлдана әңгд цергт авв. 2017 җиләс авн болхла баахн мергҗлт Москван мүҗин Химки балһсна болн зергләд Красногорск балһсна эмнлһст рентген кедг кергсл чадмгар олзлҗ, күцәмҗтәһәр көдлсн бәәҗ.
2002 җилин хулһн сарин чилгчәр болхла Әрәсән әәрмин зергләнд цергә шишлң керг-үүлдврт орлцхин төлә дуудгдсн мөн. Түрүләд инженерн цергүдин ханьд дәәлдҗәһәд, 2023 җилин хөн сарас авн медицинск көдләч болҗ церглв. Зунарнь окопмуд малтҗ, цергә үүрмүдтән нөкд болҗасн кемд хортна зер-зевәс көлтә күндәр шавтсн болдг.
Санлын керг-үүлдврт орлцсн белвсрсн Түрвән Оксанан келсәр, өр-өвч, сән седклтә, кен- негнднь даңгин санаһарн зовад бәәдг авальнь хамдан дәәлдҗәсн үүрмүдтән чигн дөң-нөкд болхар адһдг бәәсмн. Олнд, хамгин түрүнд эврә Төрскндән тусан күргхәр зүткдг бәәснь чигн мел үнн юмн. Баатр кевәр дәәлдәд, сәәһән хәәсн Чиңһс Николаевич Залу- зөргин орденәр болн цергә үүрмүдиннь әм аврсна төлә шишлң медаляр ачлгдснь чигн темдгтә.
Химки балһсна 10-ч тойгта лицейд 6-ч болн 4-ч классмудт сурчадг хальмг баатрин хойр күүкнд эцкиннь санл мөңкрүлсн керг-үүлдвр секх күндтә зөв өггдв (зургт). Түрвән Чиңһсин аваляс нань Төрскән зөргтә кевәр харссн дәәчлә хамдан көдлҗ йовсн үүрмүднь болн ветеранск бәәрн бүрдәцсин элчнр бас эн чинртә кергт орлцсинь заах кергтә. «Мадна төлә Чиңһс цергә дү көвүн бәәсмн,минь тиигҗ дәәчнр нег-негән дуудна. Эн баахн залу мадна, эврә Төрскнә төлә әмән өгв,эндр оларн энд цуглрад, санлынь тевчҗ күндлҗәнәвидн», - гиҗ цергә шишлң керг-үүлдврин ветеранмудын бүрдәцин Химки балһсна әңгин болн бәәрн Хүүвин гешүн Владислав Степушин тоолврарн хувалцҗ, хальмг баатриг бүләнәр тодлв. Депутатнрин Хүүвин депутат Юлия Ишкован үгәр болхла, ирлцңгү керг-үүлдвр дорас өсч йовдг үйнрин төлә төрскнч сурһмҗта болҗахнь лавта юмн. Энтн санлын темдг бәәтхә сурһмҗллһна халхар ик чинр зүүҗәдг йовдл болҗана. Баатр эн йовдл баһчудт әрүн кергин, залу-зөргин, кергтә болхла эврә һазр-уснаннь төлә әмән чигн өгхин туст туурмҗта үлгүр болҗахнь маһд уга, гиҗ депутат келснь тодлгдв.
Тиигәд хальмг теегин хәәртә үрнә нерн хол Москван мүҗин Химки балһсна лицейин тууҗд мөңкинд орснь бахмҗта болв.Баатрин парт гидгнь энтн санлын темдг болҗана. Тегәд Түрвән Чиңһсин баатр йовдл цуг үйнрин төлә үлгүр-үзмҗ болҗахнь чигн лавта юмн. «Маднас зөвәр холд, күүнә һазрт мана көвүнә санл мөңкрүлҗ, олна орлцлһтаһар ирлцңгү йовдл бүрдәсинь ик чинртәд тоолх кергтә. Минь иим зөргтә хальмг дәәчнр нег һазра улстан, нег үлү өдгә цагин баһчудт, омг -бахмҗ үүдәҗәхнь лавта мөн», -гиҗ Лаганя района толһач Коган Юрий Түрвән Чиңһст нерәдсн керг-үүлдвриг өөдәнәр үнлв.
Келхд, Түрвән Чиңһс Мергн ах-дү хойр цергә шишлң керг-үүлдврт орлцад, залу-зөрмг кевәр Төрскән харсад, хооран цухрлго хортнла дәәлдҗ,әмнәсн хаһцсн болдг. Көвүдтән чик сурһмҗ өгәд, йоста хальмг залусиг өскәд-босхсн эднә эк-эцкднь бас ик ханлт өргх кергтә гиҗ сангдна.
Давсн җилин лу сард болхла эднә төрскн селәнә сойлын Герин хашад Әрәсән туурмҗин аллей секгдсн билә. Энүг цергә шишлң керг-үүлдврт болн талдан дәәнд орлцад,әмнәсн хаһцсн нег һазра улсин санлд нерәдсн болдг. Лагань балһсна төвд чигн бәәдг ирлцңгү аллейд бас күн болһн ирҗ, Төрскндән итклтә йоста баатрмудт ханлтан өргҗ бахтҗ һарна, минь тиим кевәр төрскнч седклтә баатрмудын ончта нерд кезәд чигн мартгдх зөв уга болна.
Шагҗин Любовь

Видео