Дегтр – медрлин булг

Кезәнә цагас авн мана өвкнр сурһуль-эрдмин чинриг медҗ, нутгин әмтн сурһульта болтха, бичкдүд бичкнәсн авн дегтр умшҗ өстхә гиҗ килмҗ һарһҗ йовсмн. Сүл кегдсн то-дигәр Хальмг Таңһчин әмтн икәр умшдг арвн регионмудын тоод орв.

Интернетин эв-арһар дегтрмүд умшдг улсин тооһарн мана таңһч тавдгч ормд 2025 җилд һарч. То-дигин янзд орулсн дегтрмүд умшлһнд күн болһн өдрт күсдундур час һарһдгнь медгдв. Энүнә тускар «Литрес» гидг дегтрин сервисин барин цергллтин то-диг олзҗ, ТАСС зәңглҗәнә. Умшлһна туст нүүрт Магаданск мүҗ йовна. Энд күн болһн өдртән 1 час 27 минут умшлһнд нерәднә. Әмтн олар умшдг арвн региона тоод Курганск мүҗ (1 час 25 минут), Сахалинск мүҗ (1 час 24,5 минут), Хакасия Республик (1 час 24 минут) орсмн.
Регион болһна әмтн кедү цаг то-дигин янзд буулһгдсн дегтр умшснь тоод авгдсна ашт иим юмн йилһрсмн. Регион болһна умшачнрин цаг хамцулгдад, дунд цагнь тоод авгдсмн. Дегтр экләд умшсн цаг тиигәд дунд кемҗәһәр йилһгдсмн. Цагтан Советин орн-нутгт хальмгуд хамгин икәр дегтрмүд умшдг әмтн гиҗ тоолгддг бәәсмн. «Дегтр – медрлин булг», – гисн тоолвр хальмгудын заңд тер кевәрн һол орм эзлҗәхнь байрта темдг гих кергтә.

ХӨӨЧИН Галина