«Мини дала» - гүлгн гемтә улсин төлә

Лу сарин 4-д цуг нарт-делкәд гүлгн гемәс хөрлһнә Өдр темдглнә. Эн өдр Элстд Манҗин Аркадин нертә шаңһа филармоньд «Мини дала» нертә концерт болхмн. Буйнч седклин керг-үүлдвр давуллһна седвәриг Цевгә Төлән нертә шаңһа хорин артист Александр Ванькаев татад, терүнә йовудт цуглулсн мөңгиг гүлгн гемтә улст дөң күрглһнд олзлхар шиидв.
Александр Ванькаев бийнь гүлгн гемәр гемтәд эдгсмн, тегәд эн эмнлһ авчадг улсин зовлңгиг цань уга сәәнәр меднә. Концертд энүнә үүдәсн дуд соңсч болхмн. Күсдундур частан болх концертд шаңһа хорин болн симфоническ оркестрин артистнр орлцхмн. «Энтн күүнә җирһлин, дурна, ицлин, хаалһд учрдг зовлңгиг давҗ һарлһна туск концерт болхмн. Ямаран чигн күчр-күнд йовдл учрв чигн итклән геехмн биш. Концерт үр-иньгин таалд давх гиҗ ицҗәнәв. Ода терүнд ик белдвр кегдҗәнә, намаг дөңнсн үүрмүдтән би ик ханлтта бәәнәв», – гиҗ Александр келв.
Манҗин Аркадин нертә Хальмг шаңһа филармоня художественн һардач Дедникә Ольган келсәр, буйнч седклин керг-үүлдврмүд давуллһна туст сән дамшлт хоршагдсн бәәнә, тегәд эн концерт бас өөдән кемҗәнд бүрдәгдхнь лавта. Мана таңһчд өр-өвч седклтә улс баһ биш. Эн өдрмүдт таңһчин меҗә һатц бәәдг улс бас демән күргх санаһан медүлв. Концертин болх зар ниигмин сүлҗәнд бәәнә, тегәд терүгәр дамҗад чигн мөңгән илгәҗ болҗана. Концертыг чилгчәр кедү мөңгн цуглулгдсна тускар зәңглгдхмн. Брифингд орлцсн көгҗмч Дулян Руслан бас урднь гүлгн гемәр гемтснә тускар хувалцҗ, күнд цагла бүлән үг, килмҗ болн оньг тусхаснь чидл урһаҗ дарунь эдгхд туслна гив. Эн концертд орлцх арһ учрснд эн байрта бәәхән темдглҗ, бичкн болв чигн демән күргтн гиҗ дуудвр кев. Концертыг талдан һазрт бәәдг улс бас ниигмин сүлҗәнд хәләҗ чадхмн гиҗ «Цифровая Калмыкия» бүрдәцин һардач Мунян Аркадь келв, «МендМедиа» эн төсвин зәңгллһнә дөң күргҗәнә.
– Гүлгн гемиг эртәр илдкҗ цаглань эмнлһ эклсн цагт эрк биш эдгҗ болхмн. Өдгә цагт олн зүсн эв-арһс олзлгдна. Буйнч седклин концертд цуглулгдсн мөңгн мана эмнлһд сән таал тогтахин төлә олзлгдхмн. Александр олн улст үлгүр-үзмҗ болна. Эн бийнь эдгәд, талдан улст дөң болхин төлә иим керг-үүлдвр бүрдәҗәнә. Эн концертын тускар олн улс медәд, эн седвәриг дөңнәд, иим керг-үүлдвр давуллһн сән авъяст тохрх зөвтә гиҗ тоолҗана. Гүлгн гемәс хөрлһнә нарт-делкән Өдрлә болх концертд иртн, эс гиҗ демән күргтн. Эн концерт кесг улст урмдта болхнь лавта, – гиҗ гүлгн гемәс хөрлһнә эмнлһнә ах эмч Босхмҗин Мира тоолврарн хувалцв.
«Мини дала» гидг концерт лу сарин 4-д 18.30-д Манҗин Аркадин нертә Хальмг филармоньд болхмн.
ДООҖАН Наталья