Марһанд орлцх үрвр

Цугәрәсән социальн-чинртә марһана хальмг региональн девсңгин шүүврин комиссь көдлмшән эклҗәнә. «Языковая арт-резиденция. Музыка слова» гидг марһанд орлцх саната улст үрвр кегдҗәнә.
Давсн җилин зунар мана таңһчд «Культурная карта» һарцин редактор, «Ресурсный центр в сфере национальных отношений» гидг АНО-н барин цергллтин һардач Анжелика Засядько ирсн билә. Тиигхд тер һарцла нөкцлт экллә. Әрәсән бичәчнрин Ниицәнә Хальмгин әңгин баһ наста зокъялчнрин хүүв тер бүрдәцин үүлдврлә таньлдсмн. Келн-улсин хәрлцәнә, этносойлын халхар үүлддг халхнь эднд соньн болҗ медгдв.
Цугәрәсән марһана региона девсң белдлһнд «Сумеру» сойлын төв, А. Амр-Санана нертә Келн-улсин дегтрин саңгин медлд үүлддг хальмг кел делгрүллһнә төв, «Инициатива» баһчудын төв, «Калмыкия» таңһчин зәңгллһнә агентств эрлһс орулҗ авлһнд, билгтнрин үүдәврмүдиг шинҗлҗ белдлһнд орлцҗана.
Келхәс, «Языковая арт-резиденция» гидг марһана ашлгч девсңгнь Алтан Республикд болхмн. Хальмг болн орс келәр, талдан олн келәр келврмүд, шүлгүд бичдг, ду һарһдг билгтә әмтн энүнд орлцҗ чадҗана.
Марһанд 18-әс авн 35 күрсн наста улс орлцхмн. Эврәннь үүдәврмүдән 2026 җилин лу сарин 6 күртл негн эс гиҗ һурвн үүдәвр илгәҗ чадҗанат. Хальмг келәр бичгдсн көдлмш орс келнд орчулгдх зөвтә. Нер-усан бичәд, үүдәгч көдлмшән Хальмгин баһ наста зокъялчнрин хүүвин электрона хайгар - kugultinovfest@mail.ru йовултн.
ҖИРҺЛИН Кермн