Энткг орн-нутгт болсн хургт орлцв

Туула сарин 24-әс авн 26 күртл Энткгин Дели хотл балһснд нарт-делкән бурхн-шаҗна II хург болв.
Эн керг-үүлдвр Энткгин залврин болн нарт-делкән бурхн-шаҗна ниицәнә седвәрәр бүрдәгдв. Терүнд 40 орн-нутгас 400 элч орлцв, эннь шаҗна бүрдәцсин толһачнр, багшнр, номтнр болн олна үүлдәчнр болв. Нарт-делкән ик хургт Хальмг Таңһчин делегац бас орлцснь темдгтә болв гих кергтә. Шар шаҗнд шүтдг улсин Төв заллтын ахлач гевш Йонтен, Хальмг Таңһчин залврин Ахлачин дарук Җамбинә Очр, таңһчин Толһачин селвгчнр Салыка Владимир болн Корнян Геннадий мана делегацин ханьд орв.
Нарт-делкән хургт Әрәсәд бурхн-шаҗна делгрлтин, Бурхн Багшин әрүн тоотыг Хальмг Таңһчд авч ирснә туск фильм үзүлв. Җамбинә Очр Энткг орн-нутгин премьер-министр Нарендру Модид, Энткгин сойлын министерствд болн шаҗна нарт-делкән ниицәнд мана таңһчд Бурхн Багшин әрүн тоот авч ирлһнә йовдлд туслсн төләднь ик ханлтан өргв.
Керг-үүлдврт орлцачнр бурхн-шаҗна экономикин, медицинә, шаҗна номиг өдгә цагт даслһна болн нань чигн төрәр өргн күүндвр тогтав. Келхд, эн төрмүд нидн намрар мана таңһчд болсн нарт-делкән шаҗна ик хургт бас босхгдсн билә. Элстд хәләгдсн төрмүд зөвәр соньн болсн учрар шаҗна керг-төрин клуб бүрдәлһнә туск төсвиг цуһар дөңнәд, терүнд орлцх санаһан медүлв. Элстд болсн нарт-делкән шаҗна ик хургт орлцачнр энүг бүрдәлһнә седвәриг дөңнсн билә. Терүг шар шаҗнд шүтдг улсин заллтын ахлачин дарук Җимбинә Константин толһалв.