Малчнрин төлә дааврта кем

Малчнрин төлә 2025-2026 җилмүдин үвлзлһнә кем гүргүдән орчкв. Энүг сән аштаһар давулхин төлә фермермүд эртәснь хаша-хаацан ясад, малын хотан белдв.
Хальмгин селәнә эдл-ахун министерствин зәңглсәр, таңһчин эдл-ахуст малын хот 100 һар процентд белдгдв. Һарсн җилин намр зөвәр дулан болад, мал өдртән теегт идшләд йовв, эннь хот әрвнәр олзллһнд туслв гиҗ келх кергтә. Ветеринарн халхар болхла ирлцңгү керг-үүлдврмүд бас күцәгдв.
Таңһчин селәнә эдл-ахун министерствд үвлзлһнә халхар шишлң штаб бүрдсн болдг. Шидр тенд таңһчин селәнә эдл-ахун министр Гаван Тимурин даалһсар энүнә дарук Аздан Эсен алс-зәәһин эв-арһар ирлцңгү селвлцә давулв. Таңһчин райодын АПК-н делгрлтин әңгүдин һардачнр болн мергҗлтнр терүнд орлцв.
Малын хотар тетклһнә төрәр күүндвр болв. Тер мет таңһчин эдл-ахуст малын гем хөрлһнә туст ирлцңгү керг-үүлдврмүд давулхиг бас даалһгдв.
Райодын малчнр цевр усар, тосн-түләһәр бас күцц кевәр теткгдв. Ветеринарн керг-үүлдврмүд бас цаг-болзгтнь күцәгдв. Таңһчин район болһнд шишлң штаб бас бүрдәгдв. АПК-н делгрлтин әңгин мергҗлтнр СМО-син толһачнрла болдг сүүрмүдт үвлзллһнә бачм төрмүдиг даңгин хаһлна. Долан хонг болһн тогтсн бәәдлин тускар селәнә эдл-ахун министерствд эдн зәңглнә. Тер мет райодын эдл-ахусин эдлврт шишлң техник бәәнә. Эн төрин тускар келхлә, лу сард Элстд МТЗ нертә заводын дилерск әңг секгдхмн гисн байрта зәңг һарв. Шидр Гаван Тимур тиигәрән одад бүрткв. Тенд селәнә эдл-ахун техникин зи хулддг бәәрн болн 100 трактор багтамҗта шишлң талвң секгдхмн. Энд Хальмгин фермермүд бәәтхә Әрәсән Өмн үзгин дуһргин селәнә эдл-ахун арһлачнр бас теткгдхнь лавта.
Җил болһн малчнр олн зүсн көтлврмүдт орлцад, шаңһа мөрә авна, эннь кергән делгрүллһнд эрк биш туслна. Тер мет Хальмг Таңһчин Толһач Хаска Бату селәнә эдл-ахун көдләчнрин үүлдврт онц оньган тусхаҗ цуг халхар дөңннә. Тиим кевәр фермермүд малын үвлин теҗәлән сәәнәр белдв. Үвлин дааврта кемиг һару угаһар давулҗ, хавртан малын сән төл авхар эдн зуралҗана.

КАРСАНА Евгения