Дарани наадм Екатеринбургд болхмн

Далн шаху җил хооран Москвад Советин Союз бәәсн кемд баһчудын нарт-делкән наадм болсмн. Төрскән харсгч Алдр дәәнә хөөн нарт-делкән чинртә тиим ик керг-үүлдвр түрүн болҗ бүрдәгдсмн. Һазр деер эвин бәәдл батрулхин, делкән цуг орн-нутгудын баһчудыг хамцулхин төлә тер ик хург кегдлә, цуг тивмүдт олна оньг авлсмн. Дарани наадм 1985, 2017 болн 2024 җилмүдт болсмн.

2024 җилд Сочи балһснд болсн нарт-делкән наадмд Хальмг Таңһчин делегац бас орлцла, теднә тоолврин тускар бидн цааранднь бичхвидн. Тер авъясиг цааранднь күцәх шиидвриг Әрәсән Президент Владимир Путин эврә зәрлгәрн одахн батлсмн, дарани наадмиг 2026 җилин һаха сард Екатеринбург балһснд кехмн гиҗ орн-нутгин толһачин зәрлгт келгдҗәнә. Түүнлә ирлцүләд, туула сарин 27-д Москвад баһчудын нарт-делкән наадм келһнә туск бүрдәмҗин комитетин сүүр болв. Терүг «Баһчуд болн бичкдүд» гидг Келн-улсин төсвин кемҗәнд белдҗ бүрдәҗәнә.
Бүрдәмҗин комитетин ханьд Әрәсән президентин һардврин болн орн-нутгин залврин элчнр, шаңһа күцәгч йосна бүрдәцсин көдләчнр, ик кемҗәтә Әрәсән компаньсин һардачнр, нүүрлгч ик сурһульмудын һардачнр, зәңгллһнә агентствин элчнр орв.
«Екатеринбург балһснд эн җил болх наадмд 190 орн-нутгас 10 миңһн баһ наста улс орлцх. Һазадын орна делегацс салврин кев-янзар тогтагдх, тиим шинрлт эн җил орулгдх. Тиим кевәр наадмд олн зүсн юм үүдәдг индустрийин, заллһна, номин болн технологийин, спортын, арһлачнрин, медиан болн социальн әңгин хамгин сән элчнр ирх. Эдн өдгә цагт эврә орн-нутгудын болн цуг делкән иргчиг йилһҗ авчана. Тер учрар наадмд Әрәсән хамгин сән төсвс болн дамшлт орх зөвтә, тернь ик чинртә юмн болҗана.
Баһ наста делкән нүүрләчнрт бидн эң-зах уга арһ-чидлтә Әрәсәг үзүлхәр бәәнәвидн, мана орн-нутгт олн зүсн күсл зүүҗ тедниг бәәдл-җирһлд тохраҗ чадна. Тегәд чигн 2026 җилин наадмин дуудвр «Әрәсәлә хамдан. Күслән дахҗ йов» гиҗ нерәдгдҗәнә. Әрәсән келн-улсин ниицлтин җилин йовудт наадм делкән цуг баһчудыг негдүлх. Мана орн-нутгин келн-улсин авъясин зөөриг, олн зүсиг болн ховр учр-утхинь үзүлх», – гиҗ баһчудын нарт-делкән наадмин бүрдәмҗин комитетин ахлач, Әрәсән Президентин һардврин толһачин негдгч дарук Сергей Кириенко келв.
«Сириуст» 2024 җилд наадм өөдән кемҗәнд кегдв, тегәд Екатеринбургд болх баһчудын керг-үүлдвриг бидн ик даавртаһар күцәх зөвтәвидн, гиҗ Әрәсән Залврин Ахлачин дарук, бүрдәмҗин комитетин ахлачин дарук Дмитрий Чернышенко темдглв. «Давсн җиләс авн «Баһчуд болн бичкдүд» гидг төсв күцәгдҗәнә. Түүнә ханьд «Әрәсә делкәд» гидг әңг бәәнә, тернь баһчудын нарт-делкән нөкцлтд нерәдгдҗәнә, меҗә һатц мана орн-нутгин сән авцта дүриг өргҗүлхин төлә чигн наадм күцәгдҗәнә. Наадмиг 2026 җилин һаха сарин 11-17-д бүрдәх селвг орулгдҗана», – гиҗ вице-премьер заав. Наадмин регионмудын көтлвр Әрәсән 30 регионд болхмн гиҗ Дмитрий Чернышенко келв. Һазадын орна гиичнр Абхазьд одх кергиг хәләхмн гиҗ Росмолодежин болн наадмин дирекцин көдләчнрт даалһвр өгв. Әрәсән субъектсин һардачнр теднә регионмудын делегацсин ханиг болн керг-үүлдврин көтлвриг йилһҗ автха гиҗ бас даалһв. Наадмд 5 миңһн Әрәсән болн 5 миңһн һазадын орна иргнмүд, тер тоод 14-әс авн 17 күртл наста күүкд-көвүд орлцх гиҗ заагдв.
Һазадын орна делегацсин ханиг ил марһана эв-арһар йилһҗ авх. Әрәсән болн һазадын орна делегацсин ханьд баһ наста номтнр болн шинҗләчнр, сойлын, үүдәлтин, үүдәгч индустрийин, спортын салврин элчнр болн баһ наста багшнр орлцх.
«Әрәсәд күн болһн күслдән күрнә болн тааста эрдм олҗ авна гисиг бидн үзүлх зөвтәвидн. Наадмд орлцачнр хамдан үүлдҗ иргч делкән дүриг үүдәх. Екатеринбургд сойлын керг-үүлдвр, концертс болн наадм болхмн, тиим кевәр цугтан хамцлтын болн нарт-делкән нөкцлтин таалыг өргҗүллһнд тәвцән орулх», – гиҗ Росмолодёжин һардач Григорий Гуров темдглв.
Орлцачнр болн волонтермуд Уралын шаңһа ик сурһулин шин тосхгдсн кампуст бәәх, нарт-делкән һәәхүлин «Екатеринбург-Экспо» төвд керг-үүлдврин һоллгч көтлвр күцәгдх. 2026 җилин наадмин бүрдәһәчнь Росмолодёжь болхмн. Дарани наадм 2030 җилд болхмн, түүнд 20 миңһн күн орлцх.
- Маднд 2024 җил Сочи балһснд болсн баһчудын наадм ик гидгәр таасгдв. Хальмг Таңһчин делегацд олна бүрдәцсин элчнр, баһ наста номтнр болн нань чигн баһчуд йовла, – гиҗ «Движение первых» җисәнә элч Донкан Ангира келв. – 180 орн-нутгин элчнр тер наадмд орлцв. Мана Хальмг Таңһчин һәәхүл кесг гиичнрин оньг авлв, хальмг олн улсин сойлын, тууҗин, авъясин тускар һәәхүл тодрхаһар келҗ өгв. Энд бидн мастер-классмуд болн нань чигн керг-үүлдвр бүрдәләвидн. Тиим кевәр мана таңһчин һәәхүл ик гидгәр йилһрәд бәәв, сойлын сольлцана салврар мана кесн күүндвр болн харһлтс бас цугтаднь таасгдв. Наадмд бидн кесг үүрән олҗ авлавидн. Тиим һәәхүл бүрдәлһнд Хальмг Таңһчин Толһач Хаска Бату ик дөңгән күрглә. Дарани наадмд мана делегац улм сәәнәр үүлдҗ таңһчин тускар өргнәр келҗ өгх гиҗ бат ицгтә бәәнәв, – гиҗ Ангира тоолвран келв.

ТҮРВӘН Һуна
Зургт: Донкан Ангира,
Геше Йонтен болн Анхана Саглр