Төрскән харсачнрла харһв

Сегодня, 15:15 | Общество, Таңһчин зәңгс, Зіњг

Приютна района толһач Манҗикә Басң соньн нег йовдлын тускар бичсинь умшачнртан медүлҗәнәвидн. Цергә шишлң керг-үүлдвр болҗасн һазрт дарани нег одлһндан тер йовдлла харһҗ. Тенд цергә үүлдврт орлцҗадг эврә һазра дәәчнрлә харһхар эн одв.

Авдеевка балһснд бәәдг Мария Магдаленан чонҗин хуврг Алексейла тер йовдлнь залһлдата. Приютна района Песчаный поселкин залу Чёта Санджиевич Манкуев гелң Алексейла Манҗикә Басңгиг таньлдулсмн. 2023 җилин лу сарла Чёта цергт һарч йовсмн. Тер цагас авн хальмг дәәч цергә даалһвран сән кевәр күцәҗ йовна. 2025 җиләс авн лейтенант Манкуев ротын командирин үүл дааҗ церглҗәнә. Района толһачд гелң Алексейин тускар эн келҗ өгсмн. «Эн күүнлә харһҗ, күүндҗ үзтн. Келсн үгинь соңсх кергтә», - гиҗ келәд, Манкуев толһачиг дахулад, эдниг таньлдулв.
Манжикә Басңгин тодлҗ келсәр, гелң Алексей хойр җилин туршарт эн чонҗан үлдәҗ һарчахш. Мария Магдаленан чонҗ хортна халһнд даңгин харһад бәәсн бийнь гелң чонҗас һарч йовҗахш. Гелңгин гернь хортна халдана ашт хамхрҗ тарсмн. Тиигәд чонҗ энүнә бәәрн болв. Чонҗиг юмн бичә таратха, сумн бичә тустха, дән төгсч әмтн төвкнтхә гиҗ эн мөргүл кенә. Христост даңгин зальврад, гелң Алексей әмтнд урмд болн чидл өгнә. Өөрк улстан дөң болх арһ эн олна. Хамхрҗ тарсн гермүдтән хорһдҗах бәәрн улсин - бичкдүдин болн көгшдин төвкнүн җирһлин төлә бурхндан гелң зальврна. Гелң цугтаднь дөң болхар адһдмн, ицлән бичә геетхә гиҗ зальврҗ йовна. Көвүһән хортнас бултулҗасн күүкд күүнд килмҗән өгнә. Дүлә, келкә залуд нүдн амн болҗ йовв. Геннадий гидг нертә залу нохата бәәҗ. Тер нохань халдан эклхин өмн эзндән докъя өгдг бәәҗ. Эдниг хәләвр уга хайҗ болхий, гиҗ гелң Алексей келснь Басң Вячеславовичд тодлгдв.
МЧС-т церглҗәх харсач Юрийин келсәр, гелң Алексей Авдеевка балһснд үлдсн әмтнд йоста нөкднь болн әминь харсчах йоста сәкүснь болҗана. Әмтиг подвалмудас һарһҗ авч, әәмшг уга һазрур күрглһнә көдлмш кеҗәсн харсач Юрий гелңгин буйнч үүлдвриг йир сән меднә.
Юмнас әәдго, кеҗәх кергтән итклтә, күн болһна туст ик даавртаһан меддг күүнлә харһҗ күүндсндән Манжикә Басң эн һазрин әмтн диилвр эрк биш ирхднь иткҗ, хортнас әәлго бәәхинь ухандан батлв.
Өдр болһн дәәнә әәмшгтә бәәдлд бәәх улст дөң болҗах эн күн дала үг келхш, өөрән бәәх улст дөң боллһн энүнд йирини кергнь болҗана. Әәмшг учрсн бийнь эврә һазртан үлдсн әмтнд урмднь бичә хәртхә гиҗ церглҗәх ормдан үлдҗ, хамдан бурхндан мөргәд, ээм-ээмән түшлдҗ күнд бәәдлиг давҗ һарх седклтә бәәснь эднд ик ицл зүүлһнә.
Эн һазр деер гелң Алексей болн Чёта Манкуевла әдл әмтн бәәхлә, ямаран чигн күнд тоотыг бидн дааҗ һархвидн, гисн тоолвр района толһачд эн харһлт орулҗ.
Җирһлин үндсн – өр-өвч седклтә, өөдән дааврта улс болҗана. Иим улсиг кен чигн диилҗ чадшго.
ҖИРҺЛИН Кермн

Видео