Шишлң хувцар теткв

Сегодня, 15:18 | Общество, Таңһчин зәңгс, Зіњг

Цергә шишлң керг-үүлдврт орлцад, шав авад, эмнлһнд орад, герүрн хәрҗ ирсн цергчнрт тасрхан уга килмҗ һарһгдна. Иигәд 2025 җилд Хальмг Таңһчд күнд шав авсн эрмдгтә цергә ветеранмуд шишлң хувцар теткгдв.
Ямаран шав авснь тоод авгдҗ, ода йирини җирһлднь туслх дигтә хувцн теднд уйгдҗ, 18 цергчд авч ирҗ өггдсмн. Даруһас талдан цергчнриг тиим ирлцәтә хувцар теткх зура бәәнә.
«Төрскән харсачнр» саңгин региональн әңгин зәңглсәр, цергчнрт кергтә хувцн үзүлгдҗәх манекенмуд Элстин хулд-гүүлгәнә төв болһнд тәвҗ үзүлгдҗәнә. СВО-н ветеранмудыг цогц махмудлань ирлцәтә хувцар теткнә.
Дәәнә йовудт көл-һаран авсн, нань чигн шавта болҗ эмнүлсн цергчнрт терүнәснь иштә ирлцәтә хувцн белдгдснь сән йовдл мөн. Бийән чаңһаҗ авч, ямаран чигн көдлмш кеҗ болхд цергә ветеранмудт тернь туслхмн.
Эн шишлң хувцна тоод һурвн зүсн өлг-эд орна. Терүгинь зунар, үвләр, эс гиҗ хавр-намрин кемд өмсч болдгар тер хувциг белдсмн.
УШКАНА Сувсн

Видео