Нег һазра цергчнрән дөңнәд

Сегодня, 15:22 | Общество, Таңһчин зәңгс, Зіњг

Цергә шишлң керг-үүлдвр эклснәс авн мана таңһчин әмтн күчән негдүләд, Төрскән харсачнриг дөңнҗ буйнч седклин керг-үүлдврмүд күцәҗәнә. Ик-бичкн уга цаһан седкләсн демән күргҗ, дулан хувц, хот-хол, эм цуглулҗ нег һазра цергчнриг дөңнҗәнә. Яшкулин района Улан Эрг селәнә бәәрн күүкд күн Бадмин Людмила эн кергт бас шунмһаһар орлцҗ, сул цаган тустаһар давулҗ, цергчнриг дөңнлһнә кергин седвәр татв.

Людмила Дорджиевна нидн намрар Элстд үүлддг «За наших 08» гидг саңгин үүлдврт орлцҗ, бу-селм болн цергә көлгн-күчиг бүркдг гөлм гүрдг болв. Эн саңгин ахлач Елена Барсукова цергә даалһвран күцәҗ йовдг нег һазра улст буйнч седклин дөң күрглһнә кергиг һардҗ, аһу ик көдлмш күцәҗәнә. Тегәд нег дәкҗ гөлм гүрдг улс кергтә гисн дуудвр барлсиг үзәд, Бадмин Людмила Элст балһснд одв. Талдан күүкд улсла гөлм гүрдгиг дасад, эн туст дамшлт хоршасна хөөн Людмила Дорджиевна төрскн селәндән эн үүлдвриг бас делгрүлх сана зүүв. Бәәрн дунд сурһулин һардач Бембин Делгрлә харһад, бүрдәцин улд эн кергиг бүрдәхин туст үгцәд, селәнә улст дуудвр кев. Дунд сурһульд көдлдг залу улс гөлм гүрхин төлә шишлң керсгл кеҗ өгв. Селәнә бәәрн улст дуудвр кеснә хөөн зәрмснь мөңгәрн демән күргв, наадкснь ирҗ гөлм өлглһнә кергиг эдн эклв. Дунд сурһулин багшнр болн сурһульчнр яарм давулад, цуглулсн мөңгәрн шишлң эд хулдҗ авв. Удл уга эдн дәкәд яарм давулхар зуралҗана. Төрскән харсачин Өдр угтҗ эдн цергчнрт белг йовулх саната.
Бадмин Людмилан келсәр, селәнә күүкд улс Нина Болгарина, Нина Федотова, Никән Вера, Хочна Татьяна болн Шентән Кермн энүнә седвәриг дөңнәд, эн кергт шунмһаһар орлцҗана. Өдр болһн эдн селәнә сурһульд цуглрад, цергә даалһвран күцәҗ йовдг мана нег һазра улсин сурврар гөлм гүрҗәнә. Түрүләд Людмила Дорджиевна гөлм гүрхин төлә ямаран белдврин көдлмш кехиг, хөөннь терүг яһҗ гүрхиг зааҗ дасхв. Намрас авн эдн 100 гөлм гүрҗ, СВО болҗадг һазрур йовулв.
- Бидн «За наших 08» гидг саңд күргҗ өгнәвидн эс гиҗ амрлһнд ирсн мана цергчнрт бәрүлҗ өгнәвидн. Мана көвүд Луганск, Донецк, Запорожск, Курск зөрүллтәр цергә даалһвран күцәҗ йовна. Гөлм болһнд бидн номта маань болн сурһульчнрин бичг тәвҗ йовулнавидн. Мана цергчнр эднә тускар ухалад дөңгән күргснд ханлтан илгәнә, мана бичкн болв чигн дөң эднд чидл-омг өгнә гиҗ келнә. Эднә бүлән үг маднд урмд өгч, кергән цааранднь күцәхд туслна. Дәкәд бидн мана цергчнрт дулан хувц, шикр-балта, эм цуглулҗ бас йовулнавидн. Госпитальд эмнлһ авчадг цергчнрт бас кергтә тоот арһарн цуглулҗ өгнәвидн, – гиҗ Людмила Дорджиевна келнә.
Улан Эрг селәнд бәәрн күүкд улс иим керг бүрдәсиг соңсад, Яшкуль селәнәс әмтн ирәд эднә дамшлтла таньлдҗ бас гөлм гүрдг болв. Зурһан күүкд күн өдр болһн гериннь кергән хооран сааһад, цергә даалһвран күцәҗ йовдг нег һазра улст килмҗән тусхаҗ үүлдҗәнә. Бадмин Людмила өрүн болһн 10 часла селәнә сурһульд ирәд, гөлм гүрхин төлә тасм белдәд, көдлмшин таал тогтана. Дарунь бәәрн күүкд улс ирәд, көдлмшән эклнә. Тиигәд эдн өдр болһн асхн күртл баһ гиснь хойр гөлм гүрнә. Людмила Дорджиевнан Дорҗ ач көвүнь Элстәс ирҗ бас нөкд болна. Тиигәд эн тасм керчҗ белддг кергсл кеҗ өгв. Арһлач Яшкула Михаил Кермн авальтаһан бас демән күргҗ, цаһан седкләсн цергчнриг дөңннә. Селәнә бәәрн залу күн Мирад Жумаев эврәннь көлгәрн өңгәр Элстүр «За наших 08» гидг саңд белн гөлм күргҗ өгнә. Әмт зөөлһнә туслмҗ күргҗ үүлддг залу күн түрүн сурврар дөң күргнә гиҗ Людмила Дорджаевна буульмҗтаһар келҗ ханлтан өргв.
Бадмин Людмилан тоолврар, Төрскән харсч залу-зөрмгән үзүлҗ йовдг нег һазра цергчнриг күн болһн дөңнх зөвтә. Селәнә күүкд улсин седвәр олнд үлгүр-үзмҗ болҗ, кесг цергчин әм аврлһнд туслснь ик буйнта керг мөн. «Бидн арһ-чидләрн мана цергчнриг дөңнҗ, Диилврин төлә тәвцән орулҗанавидн. Мана буйнч седклин залмҗар кеҗәдг керг Төрскән харсачнрт әмд-менд хәрҗ ирхд туслҗахнь байр үүдәнә», – гиҗ Людмила Дорджиевна келнә.

ДООҖАН Наталья
ЗУРГТ: Яшкулин района Улан Эрг селәнә күүкд улс гөлм өлгҗәх кем

Видео