Залһлдан батрҗана

Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин йовудт таңһчин эрүл-менд харлһна бүрдәцс бат залһлда бәрҗ үүлдҗәнә. Шидр Манҗин Валентинан нертә таңһчин бичкдүдин эмнлһнә 2-ч педиатрическ әңгин һардач Анастасия Горбунова Антрацитовск района эмчнрлә өнчн болн эк-эцкнин хәләвр уга үлдсн бичкдүдин эрүл-менд харлһна төрәр селвлцә давулв.
Эк-эцк уга үлдсн бичкдүдиг көвүчлҗ авсн эс гиҗ элгн-саднь теткврт авсн күүкд-көвүдин эрүл-менд шинҗллһнә, эмлһнә керг-үүлдврмүд давуллһна, социальн болн эмнлһнә бүрдәцс эн төриг дигтә-даратаһар хаһлҗ хамцу үүлдврән бүрдәлһнә төрмүд селвлцәнд босхгдв. Диспансеризац цаглань ямр нег гемиг илдкҗ авч дарунь эмнлһиг эклхҗ бичкдүдин эрүл-менд батруллһнд туслдгиг селвлцәнә йовудт келгдв. Нег үлү җирһлин күнд таалд туусн өнчн бичкдүдин эрүл-менд харлһнд онц оньг тусхах кергтә гиҗ Анастасия Горбунова темдглв.

БАТАН Сәәхлә