«Бидн – нег өрк-бүл»

07-02-2026, 13:39 | Общество, Таңһчин зәңгс, Зіњг

Мана таңһчд олн келн-улс ниитә бәәнә. Әрәсәд улсин ниицлтин җил зарлгдсн учрар таңһчин райодар олн келн-улсин иньгллтд нерәдгдсн керг-үүлдврмүд болҗана. Шидр Яшкулин района Улан Эрг селәнә дунд сурһульд «Бидн – нег өрк-бүл» гидг байр болв.

Селәнә сурһульд хальмг, орс, чечен, даргин, армян, маңһд болн талдан келн-улсин элчнр сурчана. Күүкд-көвүд ке-сәәхн хувц өмсч кеерәд, ямр нег келн-улсин сойлын, авъясин тускар келҗ өгәд, шимтә хот-хол белдв. Сурһульчнрин эк-эцкнр бичкдүдин седвәриг дөңнәд, келн-улсин хот-хол белдәд, ду-би үзүлхд селвг өгч эн керг-үүлдврт бас шунмһаһар орлцв. Олн улсин ниицлтин җилд нерәдгдсн байр өргмҗтәһәр давад, келн-әмтнә иньгллтиг батрулҗ, нег-негнәннь сойлла, авг-бәрцлә таньлдхд туслв.
Улан Эрг селәнә дунд сурһулин һардач Бембин Делгр байриг нүр үгәр секәд, дорас өсч йовдг бичкдүдт чик сурһмҗ өглһнә халхар иим керг-үүлдврмүд эрк биш кергтә гиҗ темдглв. Байрин чилгчәр бичкдүд «Бидн – нег өрк-бүл» гидг ду хамдан дуулв. Сурһулин бүрдәцд Әрәсән улсин ниицлтд нерәдгдсн керг-үүлдврмүд җилин туршарт болхмн гиҗ зуралгдҗана. Сурһульчнр болн эднә эк-эцкнр терүнд шунмһаһар орлцҗ, эврәннь келн-улсин сойлан делгрүлсн деерән үүрмүдтән билг-эрдмән үзүлх саната.

БАТАН Сәәхлә
ЗУРГТ: Яшкулин района Улан Эрг селәнә дунд сурһульд болсн байрин кем

Видео