Билгтә эмчин ке-сәәхн кегдлмүд

Сегодня, 12:06 | Общество, Таңһчин зәңгс, Зіњг

Нидн мана таңһчд экин Өдрт нерәдәд «Альков, күүкд!» гидг марһан олн эрдмин элчнр дунд бүрдәгдсн билә. Терүнд П.Жемчуевин нертә таңһчин эмнлһнә эмч Эрнҗәнә Евгения диилвр бәрәд, олн үүрмүдтән болн элгн-садндан бахмҗ үүдәв. Евгения Олеговна байн дамшлтта, өөдән мергҗлттә эмч болсн деерән һартан өөтә, билгтә күүкд күн мөн. Марһанд олн-әмтнә эрүл-мендин бәәдл харлһна туст кеҗәдг көдлмшиннь тускар келҗ өгсн деерән эврән кесн хатхмр кегдлмүд, наадһас, зургуд болн эврән уйсн ке-сәәхн хувц үзүлҗ марһанд орлцачнриг өврүлсмн.
Евгения Олеговнан келсәр, эн бичкндк цагтан әмтнә зөв харсдг, уга-яду улст дөң болдг адвокатын эрдм шүүҗ авхар зуралҗасмн. Болв ах классмудт сурчаһад эн эмч болхар шиидәд, ахр цагин болзгт шүүвртән сәәнәр белдәд Аһш балһснд эмчин ик сурһульд орсн мөн. Эн эрдм дасад, Ростов балһснд мергҗлтән өөдлүләд, Җамбинә (күүкн цага нер-уснь) Евгения таңһчин эмнлһнд күч-көлснә хаалһан эклсмн. Ик дамшлтта ах үүрмүднь Бакан Галина, Дорҗин Эльза, Мацга Светлана ахта баахн эмчд нүдн-амн болҗ, сүв-селвгән өгч, дөң-тусан күргсмн. 2008 җиләс авн таңһчин эмнлһнд көдлҗәдг эмч төлҗәд, эндр өөдән чинртә месллһ кедг сән мергҗлт болв. Сүл җилмүдт эн отоларингологическ әңгд көдлҗәнә. Ээҗнь Роза Александровна Зольванова эн эмнлһнд олн җилдән үнн-чик седклтәһәр көдләд, үүрмүд дундан тоомсрта, күндтә күн бәәсмн. Эңкр ээҗиннь нер һуташгон төләд, Евгения зе күүкнь көдлмшән ик даавртаһар күцәхәр шунна.
- Хойр ээҗм мини җирһлд онц орм эзлнә. Екатерина Ангаевна Джамбинова болн Роза Александровна Зольванова мини эңкр ээҗнр болна, эднә әрүн санлыг оньдин хадһлҗ, насни турштан бүләнәр тодлнав. Ээҗин сурһмҗар өссн бичкдүд цаһан саната, өр-өвч седклтә, һартан өөтә болна гиҗ тоолдгна. Хойр ээҗм бичкнәсм авн өкәрлҗ, килмҗән тусхаҗ чик хаалһд ик ханлтта бәәнәв. Өвкнриннь авъяс зааҗ, төрскнч сурһмҗ өгч, үүл бәрдгиг эдн нанд дасхв. Хойр ээҗм дәәнә болн тууврин зовлң дааҗ, җирһлдән дала му үзсн бийнь кен-негнднь нөкд болҗ, өр-өвч седклтә улс билә. Һартан өөтә ээҗнрин нилчәр хувц уйдг, юм өлгдг, хатхмр хатхдг дасч авлав. Бийснь эдн хара суудмн биш, герин көдлмш кеһәд, хот-хол белдәд, ааһ-саван уһаһад, сул цаг учрхла үүл бәрдг билә, тегәд би бас ке-сәәхн хувц уйҗ-өлгдг дассн болҗанав. Ода көдлмшин хөөн сул цаган олзта-тустаһар давулҗ, олн зүсн кегдл кеһәд, зург зурҗ амрнав, - гиҗ Евгения Олеговна келнә.
Келхд, энүнә хойр аавнь мана таңһчд бас күндтә болн нертә улс бәәсиг онц темдглх кергтә. Җамбинә Ярослав Төрскән харсгч Алдр дәәнә ветеран бәәсмн, олн җилдән «Хальмг үнн» газетин ах редактор болҗ көдләд, хальмг кел, сойл делгрүллһнд ик тәвцән орулсн күн болна. Лиҗин Николай болхла мана газетин редакцд олн җилдән зург цокачар көдлсмн, эн эс одсн селән, эс күрсн малын хош мана таңһчд уга болх гиҗ сангдна. Дәәнә һалд тусад, дааврта көдлмш күцәҗ йовсн бийнь аавнрнь ачдан болн зе күүкндән чик сурһмҗ өгч, үлгүр-үзмҗ болв. Евгения Олеговнан келсәр, эн бичкндән аавнран дахад көдлмштнь оддг бәәсмн. Эднә өрк-бүлд «Хальмг үнн» газетиг ик-бичин уга күндлҗ бичүлҗ авна, гиҗ эн бахтна.
Бичкнәсн авн үүл бәрдг дассн күүкн хәрд һарад, хойр көвүтә болхларн теднд болн элгн-садндан бас хувц уйдг болв. Эн бүшмүд бәәтхә, күлт чигн уйҗ һарһна. Хадм эцк-эк хойртан сәәхн көнҗл уйҗ белглв. Эн олн зүсн эдин тасрха олзлад, өңг-өңгәрнь негдүләд сәәхн кегдлмүд уйна. 2023 җилд Эрнҗәнә Евгения зурһан сардан амрлһна өдрмүдт Элстин политехникин колледжд сурад, уячин эрдмтә мергҗлт болв. Эврәннь патьртан күүкд күн сән таал тогтаһад, юм уйдг кергсл углҗ тәвв. Үүл бәрәд, шин кегдл кесн цагтан эн өдр-бүрин төрмүдин тускар мартна. Намр авальнь болн Байр Очр хойр көвүнь энүнә тааста кергинь дөңнҗ, цуг халхарнь нөкд болна.
Эрнҗәнә Намр Евгения хойр арвн дөрвн җилдән ниитә бәәнә, хойр көвү өскчәнә. Герин эзн МЧС-ин көдләч болна, кергнь бас амр биш, ик дааврта. Хойр көвүнь сурһульчнр мөн, эдн бичкнәсн авн спортар соньмсад, цогц-махмудан батрулна. Келхд, Евгения Олеговна бийнь бас бичкнәсн авн спортар соньмсна. Эн Хальмг Таңһчин уйн наста спортсменмүд дунд долан дәкҗ чемпиона нер зүүсмн, Әрәсән марһанд күрл мөңгн медаль шүүҗ авсмн. Дунд болн ик сурһульд сурч йовсн цагтан болн ода таңһчин эмнлһнд чигн көдлҗәһәд теннисәр болдг марһаст даңгин орлцна. Эк-эцкнь хойр көвүндән чик сурһмҗ өгч, үлгүр-үзмҗ болхар шунна. Тиигәд, эдн өрк-бүләрн «Ноһан балһсн» гидг керг-үүлдврт орлцад, олн зүсн модд суулһсмн. Күн болһн бәәсн һазртан эзни хәләцтәһәр бәәҗ, эргндк йиртмҗиг әрүнәр хадһлҗ цеврәр бәрх зөвтә гиҗ эдн тоолна. Эрендженовихн хамдан сул цаган давулҗ зуульчлхдан дурта, эдн Әрәсән кесг балһсдт одад ирв. Ээҗнь Роза Александровна бас зуульчлхдан дурта бәәсмн, тегәд зе күүкнь дахад һазадын кесг орн-нутгт йовсан тодлна.
- Тааста эрдмәрн көдлҗ, олн зүсн гемәс эдгхд әмтнд дөңгән күргнәв. Көдлмшин халхар мергҗлтән өөдлүлҗ, эмнлһнә туст шин эв-арһс олзлхар шуннав. Регионмуд хоорндк болн орн-нутгин дамшлтын керг-үүлдврмүдт орлцҗ медрлән гүүдүлҗ, месллһ келһнә туст ямаран шинрлтс һарсна тускар соньмснав. Йирин шин медрл дасх, урднь одад уга һазрт күрх кергтә гиҗ саннав. Бичкнәсн авн үүл бәрдг болад, немр эрдмтә болсндан байрлнав. Нидн таңһчин күүкд улс дунд болсн марһанд диилвр бәрәд, көдлмшәс нань талдан керг күцәҗ, тааста үүлдврт цаг олҗ болхиг кен-негнднь медүлләв. Ниитә өрк-бүлд көвүд сән үрд болҗ өсчәнә. Иим байрта йовдлмуд ик урмд өгнә, җирһл сәәхнинь болн соньн тоотынь герчлнә, - гиҗ Евгения Олеговна келнә.
Билгтә эмчин ке-сәәхн кегдлмүд
Билгтә эмчин ке-сәәхн кегдлмүд
Билгтә эмчин ке-сәәхн кегдлмүд
Билгтә эмчин ке-сәәхн кегдлмүд
ДООҖАН Наталья
ЗУРГУДТ: таңһчин эмнлһнә эмч Эрнҗәнә Евгения көдлмштән; билгтә эмчин сәәхн зургуд болн уйсн көнҗлнь

Видео