Зарһин приставмудын үүлдврәс

Һардачин туст керг бүтәгдв.
Баһ Дөрвдә района зарһин приставмудын әңгин көдләчнр бүрдәцин һардачин туст керг бүтәв.
Бәәрн залу күн кредит авад, зуг өрән цаг-болзгтнь даңцасн уга болв. Приставмудын көдләчнр бүтәгдсн кесг кергүдиг хамцулад, дарунь поштар бүрдәцин хайгар илгәҗ. Бичг авсн һардач энүгән бүрдәцин тоочд үзүлсн уга бәәҗ. Ирлцңгү шиидврәр сар болһн һардачин җалвин өр даңцалһнд йовулгдх зөвтә бәәсмн.
Хөөннь эн һардач дәкнәс зөв-йос эвдснь илдкгдв. Өдгә цагт энүнә туст бүтәгдсн керг Элст балһсна прокуратурт йовулгдсн болв. Ирлцңгү керг зарһд хәләгдснә ашт зөв-йос эвдсн һардачин туст шиидвр батлгдхмн.

Му чинртә әрк хулдад
Му чинртә әрк-чаһр болн тәмк хулдҗасн залун туст зарһин керг бүтәгдәд, эн 500 миңһн арслңга ялд унһагдв. Зуг цагтнь өрән даңцалго бәәсмн. Тиигхләнь Целинн болн Приютна райодын зарһин приставмуд энүнә туст керг бүтәсн бийнь залу күн өрән даңцасн уга. Хөөннь приставмуд 500 миңһн арслңга өрнә ормд энүг түүрмд суулһхар седәд, ирлцңгү цаас терүнд йовулҗ. Тиигхлә эн залу тер дарунь гилтә өрән бүклднь даңцасн болдг.

Согтуһар маши залад
Городовиковск района зарһ согту җолачин «Лада-Гранта» тамһта маши бәрәнд авхар шиидв. Энүгән күцәһәд, җолачин көлгинь хулдад, һарһҗ авсн мөңгинь шаңһа хазнд орулхар шунв.
Зарһин шиидврәр авгдх өлг-эдиг талдан күүнә нернд орулҗ болшго. Эннь илдкгдәд, эзнә туст немр керг бүтәгдәд, ирлцңгү керг-үүлдврмүд давулгдхмн. Тегәд зарһин шиидвриг эрк биш күцәх кергтә, гиҗ приставмуд олнд тодлулҗана.
ОЛЬДАН Цаһан